Maddə 1. Giriş
1.1. Wikisun qlobal ensiklopedik platforma olan Vikipediyada (Wikipedia) Azərbaycan dilində yerləşdirilən məqalələrin sayını artırmaq üçün yaradılmış layihədir. Siz son 30 gün ərzində Vikipediyaya yerləşdirdiyiniz məqaləni həm də wikisun.az-da yerləşdirməklə müsabiqələrdə iştirak etmək hüququ qazanırsınız.
1.2. Platformamıza daxil olmaq və ya istifadə etməklə, siz aşağıdakı şərtlərə əməl etməyə razılaşırsınız.
Maddə 2. Yazı qaydaları
2.1. Məqalələrdə aşağıda qeyd edilən yazı qaydalarına mütləq əməl olunmalıdır.
2.1.1. Məqalələr süni intellekt tərəfindən yazılmamalıdır.
2.1.2. Məqalə adları və sinonimləri məqalədə ilk cümlənin lap əvvəlində yazılmalıdır, yazılışı qalın (bold) olmalıdır və tire ilə ayrılmalıdır: Məsələn: Alqoritm — riyaziyyatda əsas anlayışlardan biri.
2.1.3. Məqalə bölümlərə və alt başlıqlara ayırılmalıdır. Başlıq və alt başlıqlarda yalnız ilk sözlər böyük hərflə yazılmalıdır. Məsələn: Alqoritmdən istifadə qaydaları.
2.1.4. Vurğulamaq istədiyiniz sözləri kursiv ilə (italic) yazın, böyük və ya qalın yazmayın.
2.1.5. Həddindən artıq sitatdan istifadə ensiklopedik yazı üslubu ilə uyğun gəlmir və bu, müəllif hüquqları pozuntusu halı ola bilər. Ümumiyyətlə məzmunun Vikipediya redaktorlarının öz sözləri ilə yazılması tövsiyə olunur. Lazım gələrsə, sitatları parafraza edərək aydın və qısa mətnə çevirməyi nəzərdən keçirin.
2.1.6. Məqalələrdə istifadəçi öz şəxsi mülahizələrini yazmamalıdır. Yazdığı mətnin mənbəsi mütləq göstərilməlidir. Mənbə göstərilməyən mətnin doğruluğu şübhə doğurduğundan, onun silinmə ehtimalı daha böyükdür. Hər-hansı bir ideologiya, fəlsəfi, dini, siyasi baxışı təbliğ edilməməlidir.
2.1.7. Vikipediya yazı standartlarına uyğun formada yazılmalıdır. (Yazı standartları ilə bağlı öhdəliklər Maddə 6. Məqalələrdə diqqət edilməli orfoqrafiya qaydaları’nda qeyd edilib)
2.1.8. Mənbələr istifadə olunan zaman etibarlı mənbələrdən istifadə edilməlidir. (Dövlət qurumları, beynəlxalq və yerli ensiklopediya, qəbul olunmuş agentliklər, medialar, tanınmış saytlar və s. Kitab adlarına istinad verilməməli, istinadlar link şəklində olmalıdır)
2.1.9. Qəbul olunmamış məqalə təkrar yüklənməməlidir. (Çünki bu artıq spam hesab olunur) Yalnız istinadlarında problem olan məqalələr istinadları redaktə edildikdən sonra təkrar yüklənə bilər.
2.1.10. Bir məqalə barədə, hətta Vikipediyanın özündə başqa dillərdə məqalə yoxdursa (və ya sadəcə bir dildə varsa) elə mübahisəli məqalələrdən uzaq durmaq lazımdır.
2.1.11. Məqalələr, məlumatlar və şəkillərdən istifadə zamanı müəllif hüquqları nəzərə alınmalı və qeyd olunmalıdır.
2.1.12. Məqalədəki mətnə müvafiq mənbədən istinad verilərkən istinad etiketi cümlənin sonunda, nöqtə qoyulduqdan sonra yerləşdirilməlidir. Ümumilikdə istənilən ifadədə istinad etiketi durğu işarəsindən (vergül, qoşa nöqtə, nöqtə-vergül) dərhal sonra, boşluq buraxılmadan qoyulmalıdır.
2.1.13. Bu qaydalara əməl edilmədiyi təqdirdə, məqalə WIKISUN platformasında yayımlanmayacaq.
2.2. Məqalə içərisində ilk rastlayışda məqalə ilə əlaqəli olan [[Səfəvilər]] şəklində daxili keçidlərdən istifadə olunması tövsiyə olunur.
2.3. Ay və gün (məsələn, 1 iyun və 12 dekabr) və il (məsələn, 1453, 1918 və 2012) haqqında olan məqalələrə keçid verilməməlidir.
2.4. Paylaşdığınız məzmunda xüsusi isimlər (şəxs adları filan) transliterasiya edilməlidir mütləq. Yəni dilimizə uyğunlaşdırılmalıdır.
2.5. Məqalədə hansısa bir Vikipediyaya, YouTube videosuna, sosial şəbəkə paylaşımına istinad etmək, yəni mənbə göstərmək olmaz. https://az.wikipedia.org/wiki/Vikipediya:Etibarl%C4%B1_m%C9%99nb%C9%99l%C9%99r linkindən keçid edərək ətraflı məlumat əldə edə bilərsiniz.
2.6. Məqalələr Vikipediyanın Ensiklopedik Əhəmiyyətlilik ( https://az.wikipedia.org/wiki/Vikipediya:Ensiklopedik_%C9%99h%C9%99miyy%C9%99tlilik ) qaydalarına uyğun olmalıdır.
Maddə 3. Məqalələrdə diqqət edilməli orfoqrafiya qaydaları
3.1. Məqalələrdə aşağıda qeyd edilən orfoqrafiya qaydalarına əməl olunmalıdır.
3.1.1. Paraqraf (§), nömrə (№), faiz (%), promille (‰) işarələri aid olduqları rəqəmlərdən "ayrılmayan boşluq" işarəsi ilə ayrılır: Məsələn: § 14, № 23, 20 %. Ancaq "%" işarəsi sözləri qısaltmaq üçün istifadə olduqda aid olduğu rəqəm ilə bitişik yazılırlar: 5%-lik həddi keçmək üçün
3.1.2. Tarixi hadisələrin, dövrlərin, sülalələrin, nomenklatur terminlə işlənən yer adlarının, eləcə də qədim yazılı abidələrin və s. adlarının birinci sözünün birinci hərfi böyük yazılır. Məsələn: Vətən müharibəsi, Yeddiillik müharibə, Versal sülhü, Dəmir dövrü, Orxon-Yenisey abidələri, Çaldıran döyüşü, Sasanilər dövrü, Səfəvilər sülaləsi, Xəzər dənizi, Azadlıq meydanı, Şuşa qalası…
3.1.3. Belə mürəkkəb adlara fərqləndirici söz əlavə olunduqda onun da birinci hərfi böyük yazılır: Orta Paleolit dövrü, Son Paleolit dövrü.
3.1.4. Ölkələrin, muxtar respublikaların, vilayət və diyarların rəsmi adlarının tərkibindəki bütün sözlərin ilk hərfi böyük yazılır: Azərbaycan Respublikası, Naxçıvan Muxtar Respublikası, Bakı Şəhər İcra Hakimiyyəti.
3.1.5. Yüksək dövlət vəzifələri (Azərbaycan Respublikasının Prezidenti, Azərbaycan Respublikasının Baş naziri), fəxri adlar, habelə nazirlik, komitə, birlik, cəmiyyət, qurum, akademiya, universitet, texnikum, teatr, filarmoniya, siyasi partiya, eləcə də tarixi günlərin və s. adlarının tərkibindəki bütün sözlərin (yardımçı sözlərdən başqa) birinci hərfi böyük yazılır: Azərbaycan Respublikasının Nazirlər Kabineti, Azərbaycan Milli Elmlər Akademiyası Nəsimi adına Dilçilik İnstitutu, Beynəlxalq Qadınlar Günü, Ağstafa Rayon Təhsil Şöbəsi …
3.1.6. Orden, medal, bədii əsər, opera, balet, kinofilm, qəzet, jurnal, kinoteatr, mehmanxana, nəşriyyat, kafe, restoran, düşərgə, yeməkxana, mağaza və s. adları dırnaqda və böyük hərflə yazılır: "İstiqlal" ordeni, "Ata və oğul" povesti, "Yeddi gözəl" baleti, "Uzaq sahillərdə" filmi, "Azərbaycan" qəzeti, "Cücələrim" kafesi, "Bahar" mağazası, "İstisu" mineral suları…
3.1.7. Dırnaqda yazılan belə adlara artırılan şəkilçi dırnaqdan kənarda yazılır: "Xalq qəzeti"nin bugünkü nömrəsi, "Yeddi gözəl"in ilk tamaşası
3.1.8. Mirzə, hacı, şeyx, seyid, şah, soltan, ağa, bəy, bəyim, xan, xanım və s. sözlər rütbə, ləqəb və titul bildirib sözlərdən əvvəl gəldikdə böyük, sözlərdən sonra gəldikdə isə kiçik hərflə yazılır: Mirzə Fətəli, Hacı Qara, Şeyx Nəsrullah, Seyid Əzim, Şah İsmayıl, Soltan Mahmud, Abbas mirzə, Nadir şah, Abbasqulu ağa, Fətəli xan, Heyran xanım
3.1.9. Şablonda cümləni başlayan sözlər böyük hərflə yazılmalıdır: Kişi; Azərbaycanlı; Qırmızı
3.1.10. Yalnız "düz" dırnaq işarələrindən istifadə etməli, “bu”, «bu» və „bu“ kimi digər bənzər simvollar işlədilməməlidir.
3.1.11. Dırnaq daxilindəki yazıya daxili keçid verildikdə, dırnaq işarələri keçidə daxil edilməməlidir.
Maddə 4. İstifadəçi hesabları
4.1. Qeydiyyat: WIKISUN platformasında məqalə yayımlamaq və platforma tərəfindən keçirilən müsabiqələrdə iştirak etmək üçün siz hesab yaratmalısınız.
4.1.1. Qeydiyyatdan keçərkən siz ad, soyad və e-poçt adresinizi bizimlə paylaşırsınız.
4.1.2. Qeydiyyatdan keçərkən hesabınıza məxsus şifrə yaratmalısınız.
4.2.Təhlükəsizlik: Hesabınızın məxfiliyinin qorunmasına siz cavabdehsiniz.
4.2.1. Hesabınızın şifrəsini üçüncü tərəflə paylaşmamalısınız.
4.2.2. Hesabınızla bağlı hər hansı problem yaşadığınızda bizimlə (info@wikisun.az) əlaqə yarada bilərsiniz.
4.3. Sistemdəki qeydiyyatdan keçdiyiniz “Vikipediya istifadəçi adı”nız ilə məqaləni Vikipediyaya əlavə edən (yaradan) istifadəçinin adı eyni olmalıdır.
4.3.1.Əgər məqaləni Vikipediyada fərqli bir adla yayımlamısınızsa və bu ad sistemdəki adınızla uyğun gəlmirsə, məqaləniz avtomatik olaraq “gözləmə” (pending) statusuna düşür. Belə hallarda məqalə yalnız admin tərəfindən yoxlanılıb təsdiq edildikdən sonra qəbul olunacaq.
4.4. Hər bir istifadəçi öz Vikipediya istifadəçi adını sistemdə maksimum 3 dəfə dəyişdirmək hüququna malikdir (Köhnə istifadəçilərə də öz adlarını sistemə daxil etmək imkanı yaradılıb).
4.4.1. Əgər istifadəçi adınızı 3 dəfədən artıq dəyişməyə cəhd etsəniz, sistem hesabınızı bloklayacaq.
4.4.2. Blokdan çıxmaq və yeni ad daxil etmək üçün adminlərlə əlaqə saxlamağınız tələb olunur.
4.5. Xitam: Platformanın təqdim etdiyi “İSTİFADƏÇİ ŞƏRTLƏRİ”nin pozulması halı baş verdikdə WIKISUN sizə e-poçt vasitəsilə 3 dəfə xəbərdarlıq edəcək. Xəbərdarlığa baxılmadığı təqdirdə WIKISUN sizin hesabınızı dayandırmaq və ya ləğv etmək hüququna sahibdir.
Maddə 5. Müsabiqə şərtləri
5.1. Müsabiqədə iştirak: WIKISUN platformasında son 30 gün ərzində Vikipediyada yazdığınız məqaləni yayımlamaqla siz müsabiqədə iştirak edə bilərsiniz.
5.1.1. Daha əvvəl əlavə edilmiş köhnə məqalələr qəbul edilmir.
5.2. Qaliblər yerləşdirdikləri məqalələrə görə müəyyən edilir.
5.3. Hər məqalə aşağıda qeyd edilən meyarlar üzrə qiymətləndirilir:
5.3.1.Söz sayı. Məqalə minimum 150 sözdən ibarət olmalıdır. Məqalənin tərkibində 150-dən çox söz olması bal hesablamasında iştirakçıya üstünlük gətirir.
5.3.2.Link sayı. Məqalə minimum 4 istinad link yerləşdirilməlidir. Məqalənin tərkibində 4-dən çox istinad linki olması bal hesablamasında iştirakçıya üstünlük gətirir.
5.4. Qalibin müəyyən edilməsi düsturu:
- 150 söz: 3 bal 150 sözdən əlavə hər bir söz üçün: 0.02 bal Qeyd: Məqalədə 300 sözdən artıq sözlər üçün əlavə bal hesablanmır.
- 4 link: 3 bal 4 linkdən əlavə hər bir link üçün: 0.75 bal Qeyd: Məqalədə 7 linkdən sonra əlavə bal hesablanmır.
Nümunə: X adlı istifadəçi 1 həftə ərzində 3 məqalə yazmışdır. Birinci məqalə 150 söz, 4 linkdən, ikinci məqalə 250 söz, 6 linkdən, üçüncü məqalə isə 300 söz, 7 linkdən ibarətdir. İstifadəçinin toplam balı nə qədərdir?
1-ci məqalə üzrə bal: 150 söz=3bal, 4 link=3 bal yəni 3+3=6 bal
2-ci məqalə üzrə bal: 150 söz=3 bal, 150 sözdən əlavə 100 söz- 100x0.02=2bal 4 link=3 bal, 4 linkdən əlavə 2 link- 2x0.75=1.5 bal yəni 3+2+3+1.5=9.5 bal
3-cü məqalə üzrə bal: 150 söz=3 bal, 150 sözdən əlavə 150 söz- 150x0.02=3bal 4 link=3 bal, 4 linkdən əlavə 3 link- 3x0.75=2.25 bal yəni 3+3+3+2.25=11.25
Ümumi: 6+9.5+11.25=26.75
5.5. Qaydalara uyğun əlavə edilmiş Vikipediya məqalələri sistem tərəfindən ilkin olaraq təsdiqləndikdən sonra ballar yazarın balansına dərhal əlavə olunmur. Həmin məqalələr üçün 15 günlük xüsusi yoxlanış (gözləmə) müddəti tətbiq edilir.
5.6. Məqalə təsdiqləndikdən düz 15 gün sonra sistem (avtomatik olaraq) məqalənin Vikipediyada hələ də mövcud olub-olmadığını yoxlayır.
5.7. Əgər 15 günlük yoxlanış müddətinin sonunda məqalə Vikipediyada hələ də aktivdirsə (silinməyibsə), məqalə tam təsdiqlənmiş hesab olunur və məqalə üçün nəzərdə tutulan ballar avtomatik olaraq yazarın ümumi balına əlavə edilir.
5.8. Əgər 15 günlük yoxlanış zamanı məqalənin Vikipediyadan silindiyi və ya tapılmadığı aşkar edilərsə, sistem həmin məqaləni dərhal rədd edir.
5.8.1. Bu halda yazıçıya heç bir bal verilmir və rədd səbəbi kimi sistemdə avtomatik olaraq “15 günlük yoxlanış zamanı məqalə Wikipedia-da tapılmadı” qeydi bildirilir.
5.9. Sistemə başqasının Vikipediya istifadəçi adı ilə yayımlanmış məqalələri əlavə etmək qəti qadağandır. Əgər yazar 3 dəfə ardıcıl və ya fərqli vaxtlarda başqasına məxsus məqaləni özünəməxsus kimi sistemə əlavə edərsə, onun “Vikipediya məqaləsi əlavə etmək” hüququ sistem tərəfindən avtomatik bloklanır. Blokun qaldırılması üçün istifadəçi adminlərlə əlaqə saxlamalıdır.
5.10. Müsabiqə üzrə müvafiq olaraq, həftəlik və aylıq qaliblər müəyyən olunur.
5.10.1. Qaliblərə təşkilatçılar tərəfindən mükafatlar təqdim olunur.
5.10.2. Ballar bərabər olarsa mükafat qaliblər arasında bölünür.
5.11. Müsabiqə qalibləri ilə qeydiyyatdan keçdiyi nömrə üzərindən əlaqə saxlanılır.
5.12. Hər ayın ilk 15 günü ərzində əvvəlki ayın qalibi müəyyən edilir.
Maddə 6. Məqalələr
6.1. Sahiblik: WIKISUN-a məzmun verməklə, məqalələrinizi istənilən məqsədlə istifadə etmək, yaymaq və dəyişdirmək üçün bizə icazə verirsiniz.
6.2. Məsuliyyət: Siz töhfə verdiyiniz məzmuna görə məsuliyyət daşıyırsınız. Paylaşdığınız məzmunun qaydalara uyğun olduğundan və üçüncü tərəf hüquqlarını pozmadığından əmin olun.
6.3. Məqalələr üçün tələblər: Platformada paylaşdığınız məzmun aşağıdakı şərtlərə uyğun olmalıdır.
6.3.1. Azərbaycan qanunvericiliyinə uyğun olmayan məzmun platformada PAYLAŞILMAYACAQ.
6.3.2. Məqalələrinizdə dəqiq və yoxlanıla bilən məlumat təqdim etməyə çalışın.
6.4. Platformada yerləşdirilən məqalədə minimum 4 istinad linki (4 linkə Vikipediyanın öz şərtlərinə əsasən ehtiyac olacaqmı?) qeyd edilməli (bu linklərin sosial media platformalarına aid olmaması şərtilə), məqalə özü isə minimum 150 sözdən ibarət olmalıdır.
6.5. Məqalə daha əvvəl Vikipediyada yayımlanmamış olmalıdır.
6.6. WIKISUN əvvəlcədən xəbərdarlıq etmədən istənilən məzmunu öz mülahizəmizlə redaktə etmək və ya silmək hüququnu özündə saxlayır.
Maddə 7. Əqli mülkiyyət
7.1.Platformanın məzmunu: Yazıçıların paylaşdıqları məzmun istisna olmaqla, WIKISUN-dakı bütün kontentlər əqli mülkiyyət qanunları ilə qorunur.
7.2. İstifadə hüquqları: Qeyd edilən şərtlərə uymaqla, platforma məzmunundan şəxsi, qeyri-kommersiya məqsədləri üçün istifadə edə bilərsiniz. Saytda yerləşdirilən kontentlər icazəsiz kommersiya məqsədilə istifadə edilə bilməz.
Maddə 8. Məxfilik
8.1.Məlumatların toplanması: Biz sizin şəxsi məlumatlarınızı Məxfilik Siyasətimizə uyğun olaraq toplayırıq və istifadə edirik. Platformadan istifadə etməklə siz bizim məlumat təcrübələrimizə razılıq verirsiniz.
8.2. Kukilər: WIKISUN istifadəçi təcrübəsini araşdırmaq üçün kukilərdən istifadə edir.
Maddə 9. Şərtlərə dəyişikliklər
9.1. Biz bu şərtləri istənilən vaxt dəyişdirə bilərik. Sizin platformadan davamlı istifadəniz yenidən işlənmiş şərtləri qəbul edirsiniz. Biz platformamız və ya e-poçt vasitəsilə əhəmiyyətli dəyişikliklər barədə sizi xəbərdar edəcəyik.
Maddə 10. Bizimlə əlaqə
10.1. Bu şərtlərlə bağlı hər hansı sualınız və ya narahatlığınız üçün info@wikisun.az e-poçt ünvanı vasitəsilə bizimlə əlaqə saxlayın.
