Pont-Audemer spanyeli - Fransanın nadir ov iti cinslərindən biri. Tarix Bu cinsin Fransanın Pont-Audemer bölgəsində 19-cu əsrdə inkişaf etdirildiyi iddia edilir. Cinsin dəqiq mənşəyi məlum olmasa da, "English Water Spaniel" və "Irish Water Spaniel" kimi cinslərin bu cinsin yaranmasında rol oynadığı düşünülür. 20-ci əsrin əvvəllərində, Fransadan kənarda, bu itlər ənənəvi spanyel işləri yerinə daha çox setter kimi faydalı hesab edilirdi. İkinci Dünya Müharibəsindən sonra cinsin sayı o qədər azaldı ki, cins klubunun mövcud itlərin həddindən artıq qohumluqla çoxalması riskini aradan qaldırmaq üçün digər cinslərlə qarışdırılmasına icazə verildi. Pont-Audemer Spanyeli, "Fédération Cynologique Internationale" (FCI) tərəfindən tanınır. ABŞ-da "United Kennel Club" (UKC) tərəfindən "Gundog Group" qrupunda tanınır. Digər tanınmış it qeydiyyat klubları arasında "Continental Kennel Club", "International Canine Kennel Club" və "American Rare Breed Association" da var. Təsvir Orta ölçülü bir itdir. Çəkisi 20-27 kq arasında dəyişir və hündürlüyü təxminən 50-58 sm olur. Bu cins, ABŞ və Böyük Britaniyadakı digər ov itlərindən uzunluğu və ağzının ucu ilə fərqlənir. Tük örtüyü dalğalı və ya qıvrımdır, lakin üz hissəsində hamardır. Ən çox yayılmış rəng naxışı qəhvəyi və ağdır, lakin təmiz qəhvəyi rəng də qəbul edilir. Hər iki rəng naxışında qırmızı-qəhvəyi "ölmüş yarpaq parıltıları" ola bilər. Qara və ya qonur işarələr nöqsan hesab edilir. Üzdəki tüklər qısadır. Başın üstündəki tük topu tam inkişaf etmək üçün beş ilə qədər vaxt tələb edə bilər. Əksər Pont-Audemer Spanyellərin quyruqları kəsilib. Təbii qalan quyruqlar adətən setter kimi tüklü olur, lakin bəzən "Irish Water Spaniel"-in qısa tüklü "siçan quyruğu" da ola bilər. Xasiyyəti Pont-Audemer Spanyeli, möhkəm və çalışqan olmaqla yanaşı, spanyel cinslərinə xas olan asan öyrədilən, mehriban və sevgi dolu xüsusiyyətlərə malikdir. Bu itlər əyləncəli bir təbiətə malikdirlər və Fransada onlara "Le petit clown des marais" (bataqlıqların kiçik klounu) deyilir. Adətən ov mühitində işləyən itlər kimi tapılır və sadəcə ailə heyvanı kimi saxlanılması nadir hallarda olur. Bu itlər su iti kimi ixtisaslaşmışdır. 20-ci əsrin əvvəllərində onlar suda və ya bataqlıq şəraitində vəhşi ördək ovu üçün qiymətləndirilirdi. Bu gün də Fransada müxtəlif ərazilərdə dovşan və qırqovul ovu üçün istifadə olunur. Sağlamlıq Pont-Audemer Spanyellərində "alopesiya" (tük tökülməsi) halları müşahidə edilmişdir. Bu vəziyyət adətən 7-18 aylıq arasında başlayır və əsasən qulaq və burun bölgələrində görünür. Tədqiqatlar göstərdi ki, bu vəziyyət tük köklərinin zədələnməsi və tük şaftlarında piqmentin toplanması ilə əlaqədardır. Testlər hiperterioz kimi endokrin səbəblərin ola biləcəyini də göstərir. Qidalanma Bu cins üçün adətən gündəlik 2.25-2.75 stəkan yüksək keyfiyyətli quru it yemi tələb olunur. Balalar heyvan mənşəli zülallarla zəngin olan qida ilə qidalanmalıdır.Ən uyğun heyvan mənşəli qidalar qurudulmuş toyuq və hind toyuğu hesab olunur. Onlar həmçinin omega-6 və omega-3 yağ turşuları ilə zəngin qida məhsullarına ehtiyac duyurlar. Yetkin itlər üçün toyuq, əzələlərin inkişafı və daha güclü bədən quruluşu üçün əla zülal mənbəyidir. Ən çox qoyulan 5 ad 1. Buddy 2. Charlie 3. Sadie 4. Mollie 5. Oliver
https://en.wikipedia.org/wiki/Pont-Audemer_Spaniel
https://www.ukcdogs.com/epagneul-pont-audemer
https://basepaws.com/dog-breeds/pont-audemer-spaniel?srsltid=AfmBOoqjM0Cb6M0YG-4EEeiJn5_sJAXhaolDRpY0FNS5wR605-miUk7e
https://www.milouchouchou.com/en/all-known-canids/the-fci-breeds/pont-audemer-spaniel
https://www.dogzone.com/breeds/pont-audemer-spaniel/
Tarix : 11 yanvar 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
