Nanents çoban laykası - Rusiyanın Yamal-Nenets Muxtar Dairəsinə aid spitz tipli yerli it növü. Digər laykalardan fərqli olaraq, ov üçün daha az istifadə olunur. Xüsusiyyətlər Kiçik və orta ölçülü itlərdir. Qalın ikiqat kürkləri ya tək, ya da iki rəngli ola bilər. Boz, qəhvəyi, qırmızı, qara və ya ağ rənglərdə olurlar. Onların iki müxtəlif tük uzunluğu var: uzun tüklü olan növ "erre", qısa tüklü olan növ isə "yando" adlanır. Yay aylarında belə tüklər yaxşı inkişaf etmiş olmalıdır. Tük uzunluğundan asılı olmayaraq, üst tüklər düz, sərt və uzun, alt tüklər isə sıx və yumşaq olmalıdır. Əzələli itlərdir. Orta ölçülü pazşəkilli başları, kiçik və dik qulaqları, əhval-ruhiyyəsindən asılı olaraq ya arxaya qıvrılan, ya da aşağı salınan quyruğu var. Erkəklərin boyu 44–50 sm, dişilərin boyu isə 40–45 sm arasında dəyişir. Davranış Müxtəlif şəraitdə funksional və davamlı olmalı, minimum qayğı ilə yaşaya bilməlidir. Onlar öz sahiblərini razı salmağa çalışan, enerjili və özünə inamlı itlərdir. İnsanlara qarşı nə qorxaq, nə də aqressiv olurlar. İstifadə sahələri Ənənəvi olaraq heyvan otarmaqla əlaqələndirilsə də, çoxyönlü itlərdir və kiçik ov heyvanlarını ovlamaq, xizək iti kimi işləmək kimi müxtəlif vəzifələri yerinə yetirə bilirlər. Nenets xalqı tez-tez itlərinin keyfiyyətini həm maral otarmaq, həm də qütb tülkülərini tutmaq qabiliyyətinə görə qiymətləndirirdi. Xüsusilə sürətli itlər bir gün ərzində üç qütb tülküsünü tuta bilirdi. Gizlədilmiş əşyaları aşkar etmə kimi bacarıqlara da sahibdir. Tarix Ən qədim it növlərindən biridir və Paleolit dövründən bu günə qədər demək olar ki, dəyişməz qalmış, genetik axının az olması ilə fərqlənmişdir. Maral otarmaq üçün yüksək effektivliyi ilə qiymətləndirilən növ, 1930-cu illərə qədər Arktik dairə boyunca və Mərkəzi Avropaya yayılmışdı. Bu ərazilər Kola yarımadasından Çukota qədər uzanırdı. Nanents Çoban Laykası bir çox Avropa spitz növlərinin, o cümlədən "Alman Spitz", "Finlandiya Lapphund", "İsveç Lapphund", "Norveç Buhund" və "Norbottenspets" kimi növlərin "atası" hesab olunur. Bəzi alimlər isə bu fikri qəbul etmir və bütün bu növlərin ümumi bir nəsli kəsilmiş əcdadı olduğunu irəli sürürlər.
https://en.wikipedia.org/wiki/Nenets_Herding_Laika
https://www.americanstockdog.org/page/nenets-herding-laika
https://justusdogs.com.au/nenets-herding-laika-breed-information-puppies-breeders/
https://www.mydogbreeds.com/nenets-herding-laika
https://www.petzlover.com/ac/information/nenets-herding-laika-vs-meliteo-kinidio
Tarix : 10 yanvar 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
