Fin tazısı (Finland dilində: suomenajokoira, həmçinin Fin Brakke) - Əsasən dovşan və tülkü ovlamaq üçün yetişdirilmiş bir it cinsi. Xüsusiyyətləri Tükləri qısa, sıx və kobuddur. Xəzi qarın nahiyəsində və ayaqlarda açıq qəhvəyi rəng, kürək hissəsində qara yamaq və baş, ayaqlar, sinə və quyruq ucunda kiçik ağ işarələr var. Yetkin itlərin boyu adətən 52-61 sm, çəkisi isə 20-25 kq arasında dəyişir. Xarakteri Dostcanlı, sakit və heç vaxt aqressiv olmayan bir cinsdir. Ov zamanı enerjili və çox yönlü bir izləyicidir. Müstəqil işləməyi bacarır və izini sürdüyü heyvanı coşğulu hürüşlə təqib edir. Yüksək dözümlülüyə malik aktiv iş itləridir. Onların gündəlik uzun və sürətli gəzintilərə, həmçinin sərbəst qaçmağa və oynamağa ehtiyacları var. Orta ömür uzunluğu təxminən 12 ildir. Baxım və gigiyena Qısa və hamar tüklərini sərt tüklü bir fırça ilə daramaq kifayətdir. Lazım gəlsə, quru şampundan istifadə edilə bilər. Çimmək yalnız it çox çirklənəndə tövsiyə olunur. Fin tazıları orta dərəcədə tük tökən cinslər sırasına daxildir. Xəstəlikləri İrsi xəstəlik olan "serebellar ataksiya"dan əziyyət çəkə bilər. Bu xəstəlik səbəbindən bir çox balaların evtanaziya edilməsi zərurəti yaranır. Bu problem "SEL1L" adlı bir gendə baş verən mutasiya ilə əlaqələndirilir. Mutasiyaya uğramış hüceyrələrdə "endoplazmatik retikulum"da pozuntular yaranır və bu da xəstəliyə səbəb olur. Ümid edilir ki, gələcəkdə bu mutasiyanı müəyyən etmək və cinsdə bu xəstəliyin qarşısını almaq üçün xüsusi testlər hazırlanacaq. Tarixi 1800-cü illərdə həyata keçirilən seleksiya proqramının nəticəsi olaraq meydana gəlib. Bu proqramda fransız, alman və isveç tazılarından istifadə olunub. Məqsəd təpəli ərazilərdə və dərin qarda işləyə bilən bir ov iti cinsi yaratmaq idi. 1889-cu ildə Finlandiya Kennel Klubunun sələfi olan Suomen Kennel Klubunun yaranması bu cinsin inkişafına təkan olmuşdur. İlk Suomen Kennel Klubu sərgisi üçün üç it seçilmişdi və növbəti il bu rəqəm səkkizə çatdı. 1893-cü ilə qədər qrup, rəng və xasiyyət də daxil olmaqla bəzi cins standartlarını müəyyənləşdirməyə başladı. Fin tazısı hazırda Finlandiyanın ən məşhur it cinslərindən biridir. Cins Finlandiya və İsveçdə çox məşhur olsa da, digər ölkələrdə nisbətən nadir rast gəlinir.
https://en.wikipedia.org/wiki/Finnish_Hound
https://www.wisdompanel.com/en-us/dog-breeds/finnish-hound
https://www.dogster.com/dog-breeds/finnish-hound
https://www.dogbreedinfo.com/finnishhound.htm
https://www.kennelliitto.fi/en/dogs/finnish-breeds/finnish-hound
https://www.ukcdogs.com/finnish-hound
Tarix : 7 yanvar 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
