Əndəlüs teryeri ("Ratonero Bodeguero Andaluz") - İspaniyanın teryer tipli it növü. İspan dilindəki adı əsas fəaliyyətini əks etdirir. İspaniyanın Əndəlüs bölgəsindəki şərabxanalarda boçkalar arasında gizlənən siçan və siçovulları ovlamaq onun əsas işi olmuşdur. Bu irq, 2000-ci ildə "İspaniya Kənd Təsərrüfatı Nazirliyi" və "İspaniya Kennel Klubu" (Real Sociedad Canina de España) tərəfindən yerli İspan irqi kimi tanınmışdır. Görünüş Əndəlüs teryeri orta ölçülü bir irqdir və boyu 37–43 sm arasında dəyişir(erkəklər üçün ideal boy 40 sm, dişilər üçün isə 38 sm). Görünüş etibarilə, uzun ətraflara malik Cek Rassel Teryerinə bənzəyir. Bəzən "İspan Cek Rasseli" adlandırılır. Bu irq çevik, arıq və atletik quruluşa malikdir. Başı üçbucaq şəklində və yarı düz kəlləyə malikdir. Gözləri çox tünd rənglidir. Uzun burun və ucları əyilmiş yüksək qulaqlara malikdir. Quyruq ənənəvi olaraq dörddə bir hissəsinə qədər kəsilir, lakin bəzi fərdlər təbii qısa quyruqla doğula bilər. Xəzi qısa və sıxdır, adətən ağ rəngdədir. Üz nişanələri qəhvəyi, ağ və qara rənglərin qarışığıdır (tricolor adlanır), adətən qəhvəyi rəngli qaşlara malikdir. Temperament Bu irq canlı və cəsarətlidir, güclü ov instinktlərinə malikdir. Dostcanlı olan bu itin uşaqlarla yaxşı keçindiyi məlumdur.Xüsusilə gəmiriciləri ovlayarkən bacarıqları və diqqəti ilə seçilir. Onlar mükəmməl qoxu və görmə qabiliyyətinə malikdirlər, hərəkətlərini koordinasiya edə bilirlər və son dərəcə çevikdirlər. Sadiqlikləri, dostluqları və müxtəlif mühitlərə uyğunlaşma qabiliyyətləri ilə tanınırlar. Tarix İngilis şərab tacirləri, İspaniyanın şərab istehsal edən bölgəsi olan Xeresə yerləşərkən, bir neçə yüz il əvvəl bugünkü Tülkü teryeri irqlərinin əcdadlarını gətirdilər. Bu itlər yerli itlərlə çarpazlaşdırıldı və şərabxanalarda siçan və siçovullarla mübarizə üçün istifadə edildi. 1900-cü illərdə "Toy" Teryeri bu irqə qarışdırıldı. 1993-cü ildə ilk irq klubu, "Club Nacional del Perro Andaluz Ratonero Bodeguero" quruldu və irq standartı yazıldı. 2000-ci ildə irq "İspaniya Kənd Təsərrüfatı Nazirliyi" tərəfindən yerli İspan irqi kimi tanındı. 2024-cü ilin sentyabr ayında "Fédération Cynologique Internationale" (FCI) tərəfindən qəbul edildi. Bu irq, xüsusilə Şimali Amerikada olmaqla, bir çox kiçik kennel klubları və it qeydiyyatı qurumları tərəfindən tanınır. Sağlamlıq Əndəlüs Teryeri üçün xüsusi xəstəliklər və ya fövqəladə sağlamlıq iddiaları sənədləşdirilməmişdir, lakin erkək körpələrdə testisinin kisəyə enməməsi halları tez-tez müşahidə olunur. Qulluq Əndəlüs teryeri kiçik ölçülü olsa da, hər hansı digər it kimi çoxlu hərəkətə ehtiyac duyur. Onları gündə üç-dörd dəfə gəzdirmək ideal olardı. Bir saatlıq gəzintilər onların bütün enerjisini sərf etməsinə imkan verir. Qısa xəzi onların qulluğunu asanlaşdırır. Onları ayda bir dəfədən çox yumaq tövsiyə edilmir, çünki bu, onların qoruyucu yağ təbəqəsini itirməsinə səbəb ola bilər. Xəzinin təmizlənməsi də vacibdir, çünki bu, təbii yağların yayılmasına və xəzinin su keçirməz olmasına kömək edir. Bu qədər enerji və həyəcanlı bir it olduğu üçün tez-tez yemək yeməyə meyllidirlər. Gündəlik yeməklərini bölmək və daha az narahatlıqla yemələrini təmin etmək tövsiyə olunur. Oxşar irqlər Əndəlüs Teryerinə görünüş etibarilə oxşar (lakin eyni olmayan) irqlərə "Cek Rassel Teryeri", "Parson Rassel Teryeri" və "Rat Teryeri" daxildir. "Teryer Brasileiro" və "Yapon Teryeri" arasındakı fərqlər və oxşarlıqlar irq klubunun vebsaytında ətraflı təsvir edilmişdir. Bu irq, İspaniyada yaranan digər siçan ovu itləri ilə də bənzərdir. "Ratonero Murciano de Huerta", "Ratonero Valenciano" və "Ratonero Mallorqui" bənzər yerli siçan ovu itləri hesab olunur. Onların xüsusiyyətləri, zəkası, təlim qabiliyyəti, sosiallığı və davranışı oxşardır, lakin ölçü, rəng və quruluş baxımından fərqlənirlər. Bu irqlərin heç biri "Fédération Cynologique Internationale" (FCI) və ya "Amerika Kennel Klubu" tərəfindən tanınmır.
https://en.wikipedia.org/wiki/Andalusian_Terrier
https://wagwalking.com/breed/ratonero-bodeguero-andaluz
https://www.dogbreedinfo.com/perroratoneroandaluz.htm
https://www.milouchouchou.com/en/all-known-canids/the-fci-breeds/ratonero-bodeguero-andaluz
https://piensosloboazul.com/en-se/blogs/news/el-bodeguero-andaluz-caracteristicas-de-un-perro-ratonero
https://www.dogzone.com/breeds/ratonero-bodeguero-andaluz/
https://thecompletedog.fandom.com/wiki/Perro_Ratonero_Andaluz
Tarix : 12 yanvar 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
