Bullok sarıquşu (Icterus bullockii) - Kiçik bir "Yeni Dünya" quşu. Ümumi məlumat Bir zamanlar bu növ və Baltimore sarıquşu eyni növ hesab edilirdi və "şimal sarıquşu" adlandırılırdı. Bu quş ingilis təbiətşünas- həvəskar Uilyam Bullokun şərəfinə adlandırılmışdır. Təsvir Bullok sarıquşu cinsi dimorfizmə malikdir, erkəklər dişilərdən daha parlaq rənglərə sahibdir. Bundan əlavə, yetkin erkəklər dişilərdən bir qədər daha böyük və ağır olur. Uzunluğu 17–19 sm, çəkisi 28–43 qr, qanad aralığı 31 sm-dir. Yetkin fərdlərin ucu bizli və düz dimdiyi var. Yetkin erkəklərdə quyruq uzun, kvadrat formalı və tünd qara rəngdədir. Bütün açıq dəri qara rəngdədir, pəncələr və dimdik də qaradır, lakin alt çənənin əsası mavi-boz rəngə çalır. Yetkin erkəklər güclü ziddiyyət təşkil edən narıncı və qara lələklərə, qara boğaz ləkəsinə və ağ qanad zolağına malikdir. Boğaz ləkəsi olan dişilərin daha yaşlı fərdlər olduğu güman edilir. İcteridlərdə müşahidə edilən ümumi qanunauyğunluğa uyğun olaraq, yetkin olmayan erkək Bullok sarıquşlarının ümumi lələk naxışı yetkin dişilərə bənzəyir. Cavan fərdlər yetkin dişilərə oxşayır, lakin daha tünd qanadlara, təzə qanad örtüklərinə və çəhrayı və ya ağ dimdiyə malikdirlər. Cavan fərdlərdə cinsi dimorfizm aydın deyil. Çoxalma Bullok sarıquşları mövsümi monoqamdır. Çoxalma mövsümü adətən maydan iyul ayına qədər davam edir. Çoxalma mövsümünün başlanğıcının dəqiq vaxtı coğrafi baxımdan dəyişir. Ümumiyyətlə, çoxalma arealın ən şimal və qərb hissələrində daha gec başlayır. Cütləşmiş Bullock sarıquşları birlikdə dərin, asılı səbətlər toxuyur və bu səbətlərə üç ilə altı arasında yumurta qoyulur, baxmayaraq ki, dişilər əsasən işin çoxunu görür. Yuva əsasən bitki liflərindən, xüsusilə qabıq və incə ot liflərindən toxunur, lakin heyvan tükü də tez-tez istifadə olunur. Yuva tük, saç və mamırla örtülür. Həm erkəklər, həm də dişilər balaları böyüdür və yuvanı yırtıcılardan qoruyur. Bullok sarıquşları və Baltimore sarıquşları adətən Orta Qərbdə, areallarının üst-üstə düşdüyü ərazilərdə hibridləşir. Yayılması Bullok sarıquşları Şimali Amerikanın qərb hissəsinə endemikdir. Çoxalma mövsümündə onlara Kaskad dağlarının şərq yamaclarına qədər rast gəlmək olar. Qış aylarında bu növ Meksika və şimali Mərkəzi Amerikaya miqrasiya edir. Yaşayış mühiti Yaşayış mühitinin kənar ərazilərini üstün tutur. Xüsusilə çay kənarı zonalarını, açıq enliyarpaq meşələrini və kolluqları sevir. Çoxalma mövsümündə aparılan müşahidələr göstərir ki, bu növün fərdləri qovaq, pekan və (su yaxınlığında olarsa) söyüd ağaclarının bol olduğu əraziləri üstün tutur. Quraq ərazilərdə isə duzlu sidr və mesquite ağaclarını seçir. Kaliforniyada evkalipt ağacları əsas nektar mənbəyi kimi istifadə olunur. Qidalanma Bu quşlar ağaclar və kolluqlarda qidalanır, həmçinin qısa uçuşlarla həşəratları tutur. Əsasən həşəratlar, giləmeyvələr və nektarla qidalanır. Digər meyvələr arasında portağal və bəzən üzüm də var. Bəzi yerlərdə onları kolibrilər üçün nəzərdə tutulmuş qidalandırıcılardan istifadə edərkən görmək olar. Əlaqəli növlər Bir müddət Bullok sarıquşları Baltimore sarıquşları ilə eyni növ hesab edilirdi, lakin çoxalma məlumatları, daha sonra lələk dəyişdirmə vaxtı və DNT məlumatları göstərdi ki, Bullock sarıquşları ayrı bir növdür.
https://www.allaboutbirds.org/guide/Bullocks_Oriole/id
https://ebird.org/species/bulori
https://en.wikipedia.org/wiki/Bullock%27s_oriole
https://www.allaboutbirds.org/guide/Bullocks_Oriole/overview
https://www.audubon.org/field-guide/bird/bullocks-oriole
https://txtbba.tamu.edu/species-accounts/bullocks-oriole/
https://www.birdatlas.bc.ca/accounts/speciesaccount.jsp?sp=BUOR&lang=en
https://celebrateurbanbirds.org/learn/birds/focal-species/bullocks-oriole/
Tarix : 18 fevral 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
