Amerika tazısı - İngiltərə tazısı ilə yaxından əlaqəli bir it növü. Qoxu qabiliyyəti ilə tülkü ovlamaq üçün yetişdirilən bu cins, ABŞ-ın qurucularından olan Corc Vaşinqtonun köməyi ilə erkən inkişaf mərhələsindən keçmişdir. Tarix 1650-ci ildə Robert Bruk, ov itlərindən ibarət qrupu ilə birlikdə İngiltərədən Merilendə səfər etdi. Bu qan xətti, "Bruk tazıları" kimi tanındı və təxminən 300 il ərzində Bruk ailəsi tərəfindən qorunub saxlanıldı. Bu, bir it növü və ailə üçün ən uzun sənədləşdirilmiş yetişdirilmə tarixlərindən biri hesab olunur. "Amerika Kennel Klubu" (AKC), Corc Vaşinqtonu Amerika tazısının "Atası" kimi tanıyır. Vaşinqtonun itlərə olan sevgisi, tülkü ovlama həvəsi ilə daha da artmışdı. O, sürət artırmaq və tülkü izləmə qabiliyyəti üçün öz itlərini Fransa tazıları ("Grand Bleu de Gascogne") ilə cütləşdirdi. Bu Fransa Tazıları, Markiz de Lafayet tərəfindən ona hədiyyə edilmişdi. Təxminən iki il sonra Vaşinqton, Filadelfiyadan səkkiz və İngiltərədən iki "Yavaş Templi" tazı aldı. Bu itlərin, Fransa tazılarının və Brukun itlərindən törəyən Vaşinqtonun öz itlərinin qarışığı, müasir Amerika tazısını yaratdı. Amerika tazısı, Vaşinqtonun yaşadığı Virciniya ştatlarında yaranmışdır və Virciniyanın rəsmi itidir. İstifadəsi Bu cins, sırf tülkü ovlamaq üçün inkişaf etdirilmişdir. Qırmızı tülkünün idxalı (və ya miqrasiyası) ilə, İrlandiya tazıları da xəttə əlavə edilərək itlərin sürəti və dözümlülüyü artırıldı. Bu keyfiyyətlər bu gün də itlərdə mövcuddur. Amerika tazısı, 1886-cı ildə "Amerika Kennel Klubu" tərəfindən rəsmi olaraq tanındı. Bu gün, "Walker", "Calhoun", "Goodman", "Trigg", "July" və "Penn-Marydel" kimi müxtəlif xətlər mövcuddur. Hər bir xətt fərqli görünüşə malik olsa da, hamısı eyni cinsin üzvləri kimi tanınır. Şou itləri əsasən "Walker", atla tülkü ovunda istifadə edilən itlər isə "Penn-Marydel" xəttinə aiddir. Xüsusiyyətlər Boyu 53-64 sm, çəkisi isə 25-32 kq arasında dəyişir. Lakin bir çoxu, xüsusilə şou xətləri, daha böyük olur. Erkəklərin boyu 66-74 sm, dişilərin boyu isə 64-71 sm arasında dəyişir. Çəkisi isə 20-29 kq arasındadır. Tazının ayaqları uzun və düz sümüklüdür. Sinəsi nisbətən dar, uzun bir sifəti və böyük, qabarıq bir başı var. Qulaqları geniş və aşağıdadır. Gözləri "ela" və ya qəhvəyi rəngdədir, böyük və aralıdır. Orta uzunluqda, sıx və sərt tüklərə malikdir. Rəngləri müxtəlif ola bilər, lakin qara, ağ və qəhvəyi rəng kombinasiyası daha çox yayılmışdır. Amerika tazıları kifayət qədər tük tökür, lakin həftəlik daraqlama tökülməni azaltmağa kömək edir. Amerika tazısı, ov zamanı uzaq məsafədən eşidilə bilən musiqili səs çıxarır. Bu xüsusiyyət, "Grand Bleu de Gascogne" cinsindən miras qalmışdır. Bu səbəbdən bu cins şəhər şəraitində yaxşı uyğunlaşmır. Temperament Amerika tazısı çox sakit və mülayim xasiyyətlidir. Uşaqlar və heyvanlarla yaxşı yola gedir. Amerika tazısı çox fəal və yüksək enerjili bir cinsdir. Uzun ayaqları ilə çox sürətli bir itdir. Onlar çoxlu hərəkət tələb edir və geniş məkanlarda qaçmaq üçün əlverişlidir. Təlim Müstəqilliyi və qoxu qabiliyyəti səbəbindən bu cins üçün itaət təlimi vacibdir. Bir qoxu hiss edən tazı, əmrlərə məhəl qoymadan onu izləyə bilər. Təlim zamanı səbr və bacarıq tələb olunur. Güclü ov instinkti səbəbindən, Amerika tazıları qayışsız buraxılmamalıdır. Sağlamlıq Bu cins ümumiyyətlə genetik xəstəliklər daşımır. Lakin həddindən artıq yemək verildikdə asanlıqla çəkisi artır. Kiçik bir sağlamlıq riski "trombositopatiya" və ya "trombosit" xəstəliyidir. Bu, qan trombositlərinin zəif işləməsindən yaranır və kiçik zədələrdən sonra həddindən artıq qanaxmaya səbəb ola bilər. Müalicə adətən xəstəliyin dərəcəsindən asılıdır. Sahiblər, tez-tez qan testləri etdirərək bu vəziyyəti erkən aşkarlaya bilərlər. "Displaziya" keçmişdə Tazılarda nadir hallarda görülsə də, indi bəzi hallarda rast gəlinir. Bu cinsin ömrü 10-12 il arasındadır. Növlər Amerika Tazısının ən geniş yayılmış növü Triq tazısıdır. Triq tazısı (həmçinin Trigg Foxhound və ya Hayden Trigg Tazısı kimi tanınır), Kentukkidə Kolonel Hayden Triq tərəfindən inkişaf etdirilmişdir. Triq tazısı, 1860-cı illərdə Kentukkinin Barren qraflığında yaranmışdır. Tülkü ovu həvəskarı Kolonel Hayden Triq, ərazidə mövcud olan itlərdən daha sürətli bir tazı yetişdirmək istədi. O, "Birdsong", "Maupin" və "Walker" xətlərindən olan itlərdən istifadə edərək öz xəttini yaratdı. 1910-cu ildə məşhur ovçu Pol Reyni, Triqdən 25 it aldı və onları Afrikada ov səfərinə apardı. Reyni səfərlərindən qayıtdıqdan sonra Triqləri "dünyanın ən yaxşı və cəsarətli tazıları" elan etdi və bu, ovçular arasında onların populyarlığını artırdı. Triq tazısının erkəklərinin hündürlüyü 58-61 sm, çəkisi 20-25 kq-dır. Dişiləri hündürlüyü 51-56 sm, çəkisi 16-20 kq-dır. Uzun sifət, asıq qulaqlar və qısa, hamar tüklərə sahibdir. Rəngləri müxtəlif ola bilər, lakin "Continental Kennel Club" yalnız üçrəngli və ikirəngli itləri qəbul edir. Triq Tazısı itaətkar, lakin "inadçı" xasiyyətlidir və qoxu qabiliyyəti ilə ov üçün ideal bir növdür. Ən çox qoyulan 5 ad 1.Mickey 2.Jesse 3.Rudy 4.Gideon 5.Gaius
https://en.wikipedia.org/wiki/American_Foxhound
https://a-z-animals.com/animals/american-foxhound/
https://www.akc.org/dog-breeds/american-foxhound/
https://www.wisdompanel.com/en-us/dog-breeds/american-foxhound
https://www.dogster.com/dog-breeds/american-foxhound
https://kids.kiddle.co/Trigg_Hound
Tarix : 12 yanvar 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
