Amerika qızılı çovdarçı quşu (Pluvialis dominica) - Orta ölçülü çovdarçı quşu növü. Etimologiya Cinsin adı Latıncadan gəlir və "yağış" mənasını verən pluvia sözündən törəmişdir. Əvvəllər inanılırdı ki, qızılı çovdarçı quşları yağış yaxınlaşanda sürülər halında toplaşır. Növün adı olan dominica isə Vest-Hindistanda yerləşən Santo Domingo (indiki Hispaniola) adasına istinad edir. Təsvir -Uzunluq: 24–28 sm -Çəki: 122–194 qram -Qanad aralığı: 65–67 sm Çoxalma Çoxalma dövründə yetkin fərdlərin üzü, boynu, sinəsi və qarnı qara, başının üstü və çiyni isə ağ rəngdədir. Bel hissəsi qara və ağ ləklərdən ibarətdir və üzərində solğun qızılı xallar var. Dişi fərdlər də oxşar görünüşə malikdir, lakin onlarda qara rəng daha azdır. Qışda hər iki cinsin üst hissəsi boz-qəhvəyi, alt hissəsi isə açıq boz-qəhvəyi rəngdə olur. Başı kiçik və dimdiyi nisbətən qısadır. Amerika qızılı çovdarçı quşu dörd yumurta qoyur. Yumurtalar ağdan tutqun sarıya qədər rəngdə olur və qara-qəhvəyi ləklərlə örtülüdür. Yumurtalar təxminən 48 x 33 mm ölçüdə olur. İnkubasiya müddəti 26-27 gündür, gündüzlər erkək, gecələr isə dişi yumurtalara qulluq edir. Balalar yumurtadan çıxdıqdan bir neçə saat sonra yuvadan çıxır və bir gün ərzində özləri qidalanmağa başlayır. Yayılması Amerika qızılı çovdarçı quşunun çoxalma əraziləri Kanadanın şimalı (Baffin adası, Yukon və Britaniya Kolumbiyası) və Alyaskada yerləşən Arktik tundralardır. Onlar quru açıq ərazilərdə yerdə yuva qururlar. Bu quşlar miqrasiya edir və qışı Cənubi Amerikanın cənubunda keçirirlər. Onlar ellips şəklində miqrasiya yolu keçirlər. Yazda mərkəzi Amerikadan keçərək şimala, payızda isə qərb Atlantik və Karib dənizi üzərindən uçaraq Patagonyaya qayıdırlar. Bu quşun miqrasiya yolu 40,000 km-dən çoxdur və bunun 3,900 km-i okean üzərindədir, burada onlar yemək və ya içmək üçün dayana bilmirlər. Bu uçuşu təmin etmək üçün quşlar öncədən bədənlərində yağ ehtiyatı toplayırlar. Qidalanma Bu quşlar tundrada, çöllərdə, çimərliklərdə və qabarma-çəkilmə zonasında qidalanır. Onlar torpaq qurdları, ilbizlər, həşəratlar, xərçənglər, balıqlar, giləmeyvələr və toxumlarla qidalanır. Status 19-cu əsrin sonlarında bu quşların çox sayda ovlanması nəticəsində populyasiya heç vaxt tam bərpa olunmayıb. Hal-hazırda növ "ən az narahatlıq doğuran" kateqoriyasında təsnif edilir, lakin yaşayış mühitinin itirilməsi və digər təhlükələr davam edir.
https://www.allaboutbirds.org/guide/American_Golden-Plover/overview
https://abcbirds.org/bird/american-golden-plover/
https://www.inaturalist.org/taxa/4893-Pluvialis-dominica
https://www.audubon.org/field-guide/bird/american-golden-plover
https://www.wildlifetrusts.org/wildlife-explorer/birds/wading-birds/golden-plover
https://mdc.mo.gov/discover-nature/field-guide/american-golden-plover
https://www.nzbirdsonline.org.nz/species/american-golden-plover
https://www.oiseaux-birds.com/card-american-golden-plover.html
https://www.bto.org/understanding-birds/birdfacts/american-golden-plover
https://dnr.illinois.gov/education/wildaboutpages/wildaboutbirds/wildaboutbirdsshorebirds/family---charadriidae/wabamericangoldenplover.html
https://animalia.bio/american-golden-plover/1000#google_vignette
https://lauraerickson.substack.com/p/american-golden-plovers
https://www.nps.gov/gaar/learn/nature/american-golden-plover.htm
https://www.tn.gov/twra/wildlife/birds/waterbirds/american-golden-plover.html
https://www.naturemanitoba.ca/american-golden-plover
https://www.birdobserver.org/Better-Birding/New-England-Shorebird-Guide/American-Golden-Plover-photographic-identification-guide
https://birdtripper.com/the-american-golden-plover/
https://animaldiversity.org/accounts/Pluvialis_dominica/
http://www.joshrjones.com/blog/american-golden-plover
https://en.wikipedia.org/wiki/American_golden_plover
Tarix : 26 yanvar 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
