Tvedestrand — Norveçin Aqder əyalətində yerləşən Tvedestrand bələdiyyəsinin şəhəri və inzibati mərkəzidir. Şəhər Tvedestrandfyorden körfəzinin şimal ucunda, Norveçin 411 və 410 nömrəli əyalət yollarının kəsişdiyi yerdə yerləşir. Tvedestrand kilsəsi şəhərin mərkəzi hissəsində yerləşir. Şəhərin sahəsi 2,39 km², əhalisi 2025-ci ildə 2.891 nəfər, əhalinin sıxlığı isə 1 km²-ə 1.210 nəfər olub. Norveçdə Tvedestrand yaşayış məntəqəsi by statusuna malikdir. Bu söz ingilis dilində həm "town", həm də "city" kimi tərcümə oluna bilər. Tarixi Tvedestrand 1738-ci ildən yaxınlıqdakı Nes dəmir zavodunda istehsal olunan materialların daşınması üçün əsas limana çevrilənədək, kiçik sənaye müəssisələri olan, sahil kəndi idi. 1836-cı ildə limana ladested statusu verildi, 1 yanvar 1838-ci ildə isə yeni mülki bələdiyyə qanununa əsasən ayrıca şəhər-bələdiyyə yaradıldı. Şəhər statusunun verilməsi, limana taxta və dəmiri ixrac etmək üçün xüsusi icazə hüququ qazandırdı. 1 yanvar 1858-ci ildə aparılan inzibati sərhəd dəyişikliyi nəticəsində, qonşu Holt kənd bələdiyyəsinin ərazisindən 70 nəfərin yaşadığı hissə Tvedestrand şəhərinə birləşdirildi. 1960-cı illərdə Şey komitəsinin fəaliyyəti nəticəsində Norveçdə çoxsaylı bələdiyyə birləşmələri həyata keçirildi. 1 yanvar 1960-cı ildə qonşu Dipvoq bələdiyyəsi (əhalisi 1.805 nəfər) və Holt bələdiyyəsi (əhalisi 3.759 nəfər) Tvedestrand şəhəri (əhalisi 868 nəfər) ilə birləşdirilərək daha böyük Tvedestrand bələdiyyəsi yaradıldı. Lakin bu birləşmə nəticəsində Tvedestrand şəhər statusunu itirdi. 1996-cı ildə qəbul edilən yeni qanun, bələdiyyələrə şəhər ərazilərinə yenidən şəhər statusu verməyə icazə verdi. 1997-ci ildə bələdiyyə keçmiş Tvedestrand şəhərinə yenidən şəhər statusu verdi. Adı Adın ilk hissəsi qədim Tveyt fermasının adının yiyəlik halından, son hissəsi isə "sahil" və ya "çimərlik" mənasını verən strond sözündən yaranıb. Tveyt fermasının adı "kiçik ferma" mənasını verən qədim þveit sözünün cəm formasıdır. İdarəetmə Norveçdə bələdiyyələr yerli idarəetmənin əsas vahidləridir. Bu o deməkdir ki, şəhər və qəsəbələr sadəcə şəhər ərazilərinin adlandırılması üçün istifadə olunur və qüvvədə olan Norveç qanunvericiliyinə əsasən, onların ayrıca idarəetmə səlahiyyətləri yoxdur. Tvedestrand şəhəri Tvedestrand bələdiyyəsinin ərazisində yerləşdiyindən onun idarə olunmasına Tvedestrand bələdiyyəsinin bələdiyyə şurası cavabdehdir. Media qalereyası Həmçinin bax Norveç şəhərləri Norveç şəhərləri Esheym Honninqsvöq Holmestrand Kolverayd Kragerö Lanqesun Larvik Leknes Leyrvik Okrehamn Ondalsnes Vinstra Yerpelan İstinadlar

İstinadlar

https://az.wikipedia.org/wiki/Tvedestrand

https://geohack.toolforge.org/geohack.php?language=az&pagename=Tvedestrand&params=58_37_18.98_N_8_55_53.00_E_scale:100000_type:city

https://maps.google.com/maps?ll=58.6219389,8.9313889&q=58.6219389,8.9313889&spn=0.1,0.1&t=h&hl=az

https://yandex.ru/maps/?ll=8.9313889,58.6219389&pt=8.9313889,58.6219389&spn=0.1,0.1&l=sat,skl

https://www.openstreetmap.org/?mlat=58.6219389&mlon=8.9313889&zoom=12

https://stadnamn.kartverket.no/fakta/851324

https://web.archive.org/web/20260810010155/https://stadnamn.kartverket.no/fakta/851324

Tarix : 29 sentyabr 2026