Stüvi (tam adı Mymains Stüart Gilligan; təxminən 2005 – 4 fevral 2013) Meyn-kun cinsindən olan ev pişiyi idi. O, Ginnesin Rekordlar Kitabı tərəfindən dünyanın ən uzun ev pişiyi kimi tanınırdı. 28 avqust 2010-cu ildə aparılan ölçmə zamanı onun burun ucundan quyruğunun ucuna qədər uzunluğu 123 sm, çəkisi isə 15,7 kq olub. Stüvi, həmçinin ən uzun quyruğa malik ev pişiyi üzrə dünya rekordunun sahibi olub. Stüvi 4 fevral 2013-cü ildə, səkkiz yaşında olarkən, Nevada ştatının Reno şəhərindəki evində xərçəng xəstəliyindən ölüb. Erkən həyatı Stüvi və onun qardaşı Odin — o zamanlar Dilan və Dallas adları ilə tanınırdılar — Oreqon ştatının Hermiston şəhərində Valeri Hortonun himayəsində olan Mymains Cattery-də dünyaya gəliblər. Robin Hendrikson 2005-ci ildə hər iki pişiyi Valeri Hortondan alıb. Hendrikson onların ilk görüşünü "ilk baxışdan məhəbbət" kimi təsvir edib. Onun sözlərinə görə, Dallasın tükləri sıx və dolğun, Dilanın isə demək olar ki, heç tükü, hətta bığları belə yox idi. Hendrikson pişiyə Family Guy serialındakı Stüvi Qriffin personajının şərəfinə Stüvi adını verib. Bunun səbəbi Stüvinin daim onun ayaqları altında olması idi. Hendrikson özü də Family Guy serialının pərəstişkarı idi. İlk dünya rekordu Robin Hendrikson Stüvini pişik sərgilərinə aparmağa başlayıb. Stüvi sərgilərdə özünü çox rahat hiss edirdi. Digər pişik sahibləri onun nə qədər böyüdüyünü və uzandığını qeyd etməyə başlayıblar. Bu da Hendriksonun diqqətini cəlb edib. Stüvi iki yaş yarımlıq olarkən Hendrikson onun uzunluğunun həmin vaxt dünya rekordunu saxlayan Leo adlı pişiyin uzunluğuna yaxın olduğunu müəyyənləşdirib. İlk ölçmə zamanı Stüvi rekordu qıra bilməyib. Lakin 2010-cu ildə aparılan növbəti ölçmədən sonra onun uzunluğu Ginnesin dünya rekordu kimi təsdiqlənib. 28 avqust 2010-cu ildə Stüvi Nevada Humanitar Cəmiyyətində ölçülüb. Ölçmə zamanı onun burun ucundan quyruğunun ucuna qədər uzunluğu 123 sm olub. Sübutedici sənədlər Ginnesin Rekordlar Kitabına göndərildikdən sonra 12 oktyabrda Stüvinin dünyanın ən uzun pişiyi olması rəsmən təsdiqlənib. Stüvinin rekordu təsdiqləndikdən sonra onun və sahibinin həyatı böyük maraq doğurub və qısa müddət ərzində onlar dünyanın müxtəlif yerlərində tanınmağa başlayıblar. Terapiya fəaliyyəti İlk dünya rekordunu əldə etdikdən sonra Stüvi terapiya pişiyi kimi fəaliyyət göstərmək üçün təlim keçib və qısa müddət ərzində sertifikat alıb. O, 2011-ci ilin iyulundan terapiya pişiyi kimi fəaliyyət göstərməyə başlayıb. Stüvi yerli xəstəxanalara və Reno, Nevadadakı yaşlılar mərkəzinə baş çəkib. Onun ziyarət etdiyi bəzi xəstələr əvvəllər danışmırdılar, lakin Stüvi ilə ünsiyyət qurmağa başlayırdılar. Yataqdan qalxa bilməyən xəstələr isə onun ziyarətindən böyük sevinc duyurdular. Stüvi məktəblərə, xəstəxanalara və yaşlılar mərkəzlərinə də baş çəkib. O, həmçinin Nevada Humanitar Cəmiyyətinin heyvan sahibləndirmə tədbirlərində iştirak edib. Stüvinin terapiya fəaliyyəti onun ikinci dünya rekordunu əldə etməsinə də səbəb olub. Onu ziyarət edən bəzi insanlar pişiyin qeyri-adi uzun quyruğuna diqqət yetiriblər. 13 fevral 2011-ci ildə Stüvinin quyruğunun uzunluğu 16,34 düym, yəni təxminən 41,5 sm ölçülüb və bu göstərici ev pişiyi üçün dünyanın ən uzun quyruğu kimi qeydə alınıb. Beləliklə, Stüvi eyni vaxtda iki Ginnesin dünya rekorduna sahib olan tarixdəki ikinci pişik olub. Xəstəliyi və ölümü 2012-ci ildə Stüviyə limfosarkoma diaqnozu qoyulub. Kimyaterapiya kursundan sonra onun xərçəngdən sağaldığı bildirilib. Lakin qısa müddət sonra böyrəklərində aqressiv şiş aşkarlanıb və Stüvi bu xəstəlikdən vəfat edib. Stüvinin sahibi onun insanlarla ünsiyyəti çox sevən və yeni insanlarla tanış olmaqdan zövq alan bir pişik olduğunu bildirib. Hendriksonun sözlərinə görə, Stüvi həyatı boyu çoxsaylı insanların həyatına toxunub və buna görə o, minnətdar olub. Stüvidən sonra dünyanın ən uzun ev pişiyi rekordunu Ludo əldə edib. Ludo 118,33 sm uzunluğunda olub və Stüvidən 5 sm qısa idi. Həmçinin bax Tombili Nora (pişik) İstinadlar
https://az.wikipedia.org/wiki/St%C3%BCvi_(pi%C5%9Fik)
http://www.guinnessworldrecords.com/world-records/1000/longest-cat-(domestic)
https://web.archive.org/web/20160305034002/https://huffingtonpost.com/2013/02/06/stewie-worlds-longest-cat-dead-cancer_n_2629533.html
https://huffingtonpost.com/2013/02/06/stewie-worlds-longest-cat-dead-cancer_n_2629533.html
http://www.guinnessworldrecords.com/news/2013/2/rip-stewie-worlds-longest-cat-passes-away-46912/
http://www.cbsnews.com/news/worlds-longest-cat-dies-in-nevada/
https://web.archive.org/web/20200304235900/http://www.cbsnews.com/news/worlds-longest-cat-dies-in-nevada/
Tarix : 4 sentyabr 2026
