Qızıl buzova sitayiş — Nikola Pussen tərəfindən 1633–1634-cü illər arasında yaradılmış rəsm əsəridir. Əsər hazırda London Milli Qalereyasında saxlanılır. Tarixi Əsərdə israillilərin Qızıl buzova sitayiş etməsi təsvir olunur. Hadisə Bibliyanın Çıxış kitabının 32-ci fəslində təsvir edilir. Əsər, Turin şəhərinin Voghera markizi Amadeo dal Pozzo və əmisi oğlu Kassiano dal Pozzon tərəfindən sifariş edilmiş bir cüt rəsm əsərinin tərkib hissəsi kimi yaradılmışdır. Kassiano dal Pozzo Pussenin Romadakı əsas himayədarlarından biri idi. Cütlüyün digər əsəri Qırmızı dənizin keçilməsidir. 1685-ci ilə qədər hər iki əsər Şevalye de Lorrainin kolleksiyasına keçmiş, 1710-cu ildə isə Benigne de Ragois de Bretonvillers tərəfindən satın alınmışdır. 1741-ci ildə əsərlər Samueldən Ser Ceykob Buveri tərəfindən alınmışdır. Onun oğlu Uilyam sonradan Radnorun ilk qrafı olmuşdur. Radnor qrafları hər iki əsəri 1945-ci ilə qədər öz kolleksiyalarında saxlamışlar. Həmin il əsərlər ilk dəfə ayrılmış və Qızıl buzova sitayiş əsəri London Milli Qalereyası tərəfindən 10 000 funt sterlinqə satın alınmışdır. Məbləğin yarısı Art Fund tərəfindən ödənilmişdir. Qırmızı dənizin keçilməsi isə həmin satışda Viktoriya Milli Qalereyası tərəfindən satın alınmışdır. Əsər hazırda London Milli Qalereyasının 19-cu zalında nümayiş etdirilir. 17 iyul 2011-ci ildə əsər və Pussenin Çobanların sitayişi adlı digər rəsm əsəri qırmızı sprey boya ilə vandalizmə məruz qalmışdır. Fransızdilli vandal rəsmdəki çılpaq fiqurların əksəriyyətini qırmızı boya ilə örtmüşdü. Təsviri Əsərin mövzusu Çıxış kitabının 32-ci fəslində təsvir olunan hadisəyə əsaslanır. Musa Sinay dağına qalxarkən Harun xalqın qızıllarını toplayaraq Qızıl buzov düzəldir. Bu bütpərəstlik Misir tanrılarından ilhamlanmış bütə sitayişi əks etdirirdi və Dekaloqun üçüncü əmri ilə qadağan olunmuşdu. Musa Yeşua ilə birlikdə dağdan qayıdarkən bütpərəstlik səhnəsini görür və qəzəblənərək əlində tutduğu Qanun lövhələrini sındırmaq üçün qaldırır. Kətanın kompozisiyasının mərkəzinə yaxın, bir qədər sol tərəfdə bəzəkli postament üzərində yerləşdirilmiş Qızıl buzov təsvir olunub. Onun ətrafında solda qadın və kişilərdən ibarət rəqs edən izdiham, sağda isə diz çökmüş və Harunun çıxışına qulaq asan insanlar yerləşir. Ağ geyimdə təsvir olunan Harun izdihamın arasında görünür. Kompozisiyanın hər iki tərəfində iki ağac təsvir edilib. Sağdakı ağac qurudur, soldakı isə yarpaqlıdır. Soldakı ağac dağdan enən iki şəxsin — Musa və Yeşuanın istiqamətində yerləşir. Başının üzərində Qanun lövhələrini tutan Musa xalqın bütpərəstliyinə qəzəblənərək onları sındırmaq üzrədir. İstinadlar ↑ Art UK (ing.). Art UK. (İstifadə tarixi: 31 may 2023). ↑ "The Adoration of the Golden Calf by Nicolas Poussin". 24 aprel 2012 tarixində orijinalından arxivləşdirilib. İstifadə tarixi: 19 iyul 2011. ↑ 1 2 Wilson, Cherry. "Man held after Poussin painting is vandalised at National Gallery". The Observer. 16 iyul 2011. 10 may 2021 tarixində arxivləşdirilib. ↑ "Poussin paintings vandalised at National Gallery". BBC News. 18 iyul 2011. 14 may 2021 tarixində arxivləşdirilib. Xarici keçidlər London Milli Qalereyasının kataloq qeydi
https://az.wikipedia.org/wiki/Q%C4%B1z%C4%B1l_buzova_sitayi%C5%9F
https://artuk.org/discover/artworks/the-adoration-of-the-golden-calf-115386
https://web.archive.org/web/20120424095449/http://www.artfund.org/artwork/1532/the-adoration-of-the-golden-calf
http://www.artfund.org/artwork/1532/the-adoration-of-the-golden-calf
https://www.theguardian.com/uk/2011/jul/17/poussin-attack-national-gallery
https://web.archive.org/web/20210510194850/https://www.theguardian.com/uk/2011/jul/17/poussin-attack-national-gallery
https://www.bbc.co.uk/news/entertainment-arts-14185800
Tarix : 10 sentyabr 2026
