Qara başlıqlı kukal (Centropus steerii)-"Cuculidae" fəsiləsinə aid bir ququ quşu növü. Bu növ Filippinin Mindoro adasına endemikdir və ölkənin ən təhlükə altında olan quşlarından biridir. Dünyada kritik təhlükə altında olan yeganə kukal növüdür. Yaşayış mühitinin itirilməsi və ovlanma təhlükəsi ilə üzləşir. Təsvir və taksonomiya "EBird" bu quşu belə təsvir edir: "Mindorodakı aşağı düzənlik primar meşələrində yaşayan iri, uzunquyruq bir quş. Beli və qarnı qəhvəyi, qanadları tünd rəngdə və qəhvəyi kənarlı lələklərə malikdir. Quyruğu tünd rəngdə və mavi parıltılıdır. Qara başlıq və boynun arxa hissəsində açıq zolaqlar var. Diqqət çəkən güclü əyri dimdiyi var. Filippin kukalına bənzəyir, lakin qarnı qara deyil, qəhvəyi rəngdədir və yalnız primar meşələrdə yaşayır. Mahnısı çox dərin və enən bir səslər seriyasıdır." Cinsi dimorfizm lələklərdə müşahidə edilməsə də, dişilər erkəklərdən təxminən 20% iridir. Bu növ, Qaraüz kukal və Qısabarmaq kukal ilə qardaş növ hesab edilir. Monotipik bir növdür. Ekologiya və davranış Qara başlıqlı kukalın qidası haqqında heç bir məlumat yoxdur, lakin tipik kukal qidasına uyğun olaraq əsasən həşəratlar və bəzən kiçik sürünənlər və suda-quruda yaşayanlarla qidalandığı güman edilir. Yaşayış mühiti və qorunma statusu Təbii yaşayış mühiti dəniz səviyyəsindən 750 metr yüksəklikdə olan tropik rütubətli aşağı düzənlik meşələridir. Burada sıx kolluqlar və bambuk meşələri olan əraziləri üstün tutur. İkinci dərəcəli meşələrdə yaşaya bilmir və bu ərazilərdə Filippin kukalı ilə əvəz olunur. Nəslinin kəsilməsinin qarşısını almaq üçün 2008-ci ildə yerli təhsil proqramları başladılmış, tədqiqatlar aparılmış və ekoturizm təşviq edilərək yerli əhalinin daha davamlı məşğuliyyətlərə yönəldilməsi hədəflənmişdir. "London Zooloji Cəmiyyəti" bu quşu "EDGE növü" kimi təsnif etmiş və evolyusion fərqlilik və nəslinin kəsilmə riskinə görə üst 21 siyahıya daxil etmişdir. Lakin bu kukalın populyasiyası və yaşayış mühiti azalmaqda və nəslinin kəsilməsinə yaxınlaşmaqdadır. "IUCN" tərəfindən təklif olunan qorunma tədbirləri arasında populyasiyanı daha yaxşı başa düşmək üçün tədqiqatlar aparmaq, qalan aşağı düzənlik meşələrini daha yaxşı qorumaq və bu növ haqqında məlumatlılığı artırmaq daxildir.
https://ebird.org/species/blhcou1
https://en.wikipedia.org/wiki/Black-hooded_coucal
https://datazone.birdlife.org/species/factsheet/black-hooded-coucal-centropus-steerii
https://www.oiseaux.net/birds/black-hooded.coucal.html
https://birdsoftheworld.org/bow/species/blhcou1/cur/multimedia?lang=es&media=illustrations
https://www.inaturalist.org/taxa/1675-Centropus-steerii
https://xeno-canto.org/species/Centropus-steerii
https://avibase.bsc-eoc.org/species.jsp?avibaseid=7F4345B1F6F83660
https://www.edgeofexistence.org/species/black-hooded-coucal/
https://www.artistsforconservation.org/silent-skies/black-hooded-coucal-steeres-coucal-3707
Tarix : 12 fevral 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
