Piksi-Bob - Təbii şəkildə meydana gəlmiş vaşaq hibridlərinin nəslindən olan ev pişiyi. Tarix 1985-ci ilin yazında Carol Ann Brewer Vaşinqton ştatının Mount Baker yaxınlığında ləkəli xəzi, qısa quyruğu və çoxbarmaqlı (polydaktil) ayaqları olan unikal bir erkək pişik aldı. 1986-cı ilin yanvarında isə Keba adlı başqa bir erkək pişik əldə etdi. Bu pişik çox iri, qısa quyruqlu idi. Hətta vaşaq tərəfindən doğulduğu iddia edilirdi. Aclıqdan zəifləsə də, çəkisi təxminən 7,7 kq idi və boyu Brewerin dizinə çatırdı. Bu iri pişik qonşunun ləkəli qəhvəyi rəngli dişi pişiyi ilə cütləşdi. 1986-cı ilin aprelində bu cütləşmədən balalar doğuldu. Brewer balalardan bir dişi pişiyi, "Piksi" adlandıraraq, saxladı və bir il sonra Piksini əsas pişik kimi istifadə edərək yetişdirmə proqramına başladı. Növbəti bir neçə il ərzində Brewer, yaxınlıqdakı Cascade dağları ətrafından 23 pişik gətirdi. Bu pişiklərin vaşaqlar və ev pişikləri arasında təbii cütləşmələrdən doğulduğu düşünülürdü. Brewer bu pişiklərə "Legend Cat" (Əfsanə Pişik) adını verdi və bu termini yalnız öz yetişdirmə proqramında istifadə edilən kəsişmələri təsvir etmək üçün ABŞ-da qeydiyyata aldı. Eyni zamanda, ABŞ-da digər yetişdiricilər də vəhşi görünüşlü təsərrüfat pişikləri ilə işləyirdi və Brewer ilə əməkdaşlıq edərək geniş genetik baza yaratdı və bugünkü Piksi-Bob irqinin əsasını qoydu. Brewerin rəhbərliyi altında, bu yeni irq "The International Cat Association" (TICA) və nəhayət "American Cat Fancier's Association" (ACFA) tərəfindən qeydiyyata alındı. Piksi-Bob 1993-cü ildə "TICA" tərəfindən "Nümayiş" kateqoriyasına qəbul edildi, 1996-cı ildə "Yeni İrq və Rəng" statusuna yüksəldi və nəhayət 1998-ci ildə Çempionat statusu aldı. Piksi-Bob ilk əvvəllər "TICA" tərəfindən "Yerli Yeni İrq" kimi təsnif edilirdi, lakin indi müəyyən edilmiş bir irq kimi qəbul edilir. 1999-cu ildə Frank Ditto Piksi-Bob irqini patentləşdirməyə cəhd etdi, lakin ABŞ Patent və Əmtəə Nişanı Bürosu tərəfindən müraciəti rədd edildi. Ardıcıl məhkəmə prosesləri də bu rəddi təsdiqlədi. İrq standartı Adi ev pişikləri orta hesabla 4 kq çəksə də, Piksi-Boblar bir qədər daha iri ola bilər, lakin orta hesabla 5 kq-dan çox olmur. Yalnız bir neçə yetişdirici müntəzəm olaraq daha iri pişiklər yetişdirir ki, bu pişiklər ümumiyyətlə iri sümüklü, əzələli və kütləvi quruluşa malikdir. Erkək Piksi-Boblar çox vaxt dişilərdən daha iri olur. Piksi-Boblar bir il əvəzinə dörd ilə qədər böyüyür. Piksi-Bobların çoxunun ayaqlarının alt hissəsində qara tük və dəri, qulaqlarının ucları qara, qulaq tükləri sıx, dodaqları qara və göz ətrafında ağ tük olur. Ağız hissəsi genişdir, yumru bığ yastıqları və qırmızı burun dərisi var. Çənələrində ağ tük olsa da, tez-tez qara dəri altlığı olur. Bığlarının təxminən 25%-i qara (kök hissəsi), 75%-i isə ağ (uc hissəsi) olur. Vaşaqa bənzər xəzin naxışları çox vaxt qırmızı, ərik və şaftalı rənglərlə qarışıq olur. Əksəriyyəti qısa tüklüdür, lakin bəziləri uzun tüklü ola bilər. Alın hissəsi ağır, gözlər isə üçbucaq formasında olmalıdır. Balaların gözləri mavi olur, bir neçə ay sonra yaşıl və ya qızılı rəngə çevrilir. Quyruq uzunluğu 5 sm olur. Baş armud şəklindədir və ən vacib xüsusiyyət hesab olunur. Xasiyyət Piksi-Boblar yüksək intellektli, sosial, fəal, cəsarətli və digər heyvanlarla oynamağı sevən pişiklər kimi təsvir edilir. Onlar həmçinin "cırıltı", danışıq və hırıltı səsləri ilə tanınır. Çox az miqdarda miyoldayırlar. Piksi-Bobların əksəriyyəti həm sahibləri, həm də yadlar ətrafında yüksək dərəcədə sosialdır. Demək olar ki, bütün Piksi-Boblar sahibləri ilə eyni otaqda olmağı sevirlər və onları evdə izləyirlər. Sağlamlıq Piksi-Boblar tez-tez "əfsanə pişiklər" ilə kəsişdirildiyi üçün genetik müxtəlifliyə malikdirlər və qohum cütləşmələrdən yaranan problemlərə meylli deyillər. Piksi-Bob yetişdiriciləri sağlamlıq məlumatlarını qeyd etmək və izləmək üçün "Pawpeds" adlı xəstəlik məlumat bazasından istifadə edirlər. Xəstəliklər - Kriptorxidizm- 1980-ci illərdə bu irqin yaranmasından bəri yalnız bir neçə hal qeydə alınıb. - Distosiya və kistik endometrial hiperplaziya - Çox az sayda Piksi-Bob doğuş problemlərindən əziyyət çəkir və yetişdirmədən çıxarılır. - Hipertrofik kardiyomiopatiya (HCM) —-1980-ci illərdən bəri yalnız bir neçə hal qeydə alınıb. Bu halların bəzilərində Piksi-Bob Bengal və Maine Coon kimi digər irqlərlə kəsişdirilib. HCM hallarının ən azı 50%-i irsidir və pişiklərin sağlamlığını izləmək üçün illik ultrabab təqibi tələb olunur. - Tıxanmış göz yaşı kanalları

İstinadlar

https://en.wikipedia.org/wiki/Pixie-bob

https://www.thesprucepets.com/pixie-bob-cat-profile-554218

https://www.purina.co.uk/find-a-pet/cat-breeds/pixiebob

https://www.viovet.co.uk/breed_information/1-63/Pixie-bob

https://www.catster.com/cat-breeds/pixie-bob/

https://www.webmd.com/pets/cats/what-to-know-pixiebob

https://www.purina.co.nz/find-a-pet/cat-breeds/pixiebob

https://www.wisdompanel.com/en-us/cat-breeds/pixiebob

https://www.petmd.com/cat/breeds/pixiebob

https://tica.org/breed/pixiebob/

https://cats.com/cat-breeds/pixie-bob

https://www.litter-robot.com/blog/pixie-bob-cat/?srsltid=AfmBOoqg6GIirsYcKDafsjx5zv5J8qkaOYoYfFx8VMTx72IUzrvZAnSE

https://felinefancy.co.uk/blogs/cat-breeds-info/pixiebob?srsltid=AfmBOor0mw6gTEiCkfq-v9InmzSe7X1vRdFmqmrgEabWUInMvj1tSR6Y

https://www.holistapet.com/blogs/cat-breeds/pixie-bob?srsltid=AfmBOoq39dwfe2ohOE-GF5B9Zm7r8cY4ZHw_t7QUKsu0nneHthI1PQ2z

https://www.omlet.co.uk/breeds/cats/pixie_bob/

https://scrumbles.co.uk/blogs/news/pixiebob-cat-breed-guide

https://vetschoice.guildinsurance.com.au/cats/cat-breeds/pixie-bob

https://pawesomecats.com/pixie-bob-cat-breed-profile/

https://cattime.com/cat-breeds/pixie-bob

Tarix : 22 yanvar 2025

Əksi qeyd olunmayıbsa, bu məzmun CC BY-SA 4.0 çərçivəsində yayımlanır.