Pərdə, bardaq və meyvə vazası (fr. Rideau, Cruchon et Compotier) — fransız rəssamı Pol Sezan tərəfindən təqribən 1893–1894-cü illərdə çəkilmiş, kətan üzərində yağlı boya ilə işlənmiş əsərdir. Bu, formal natürmort kompozisiyasıdır və Sezanın əşyalarda forma, tarazlıq və simmetriyanı araşdırmasını nümayiş etdirir. 10 may 1999-cu ildə əsər Sotheby's hərracında 60,5 milyon dollara satılmış və bununla da hərracda satılan ən bahalı natürmort olmuşdur. Arxa plan Sezan yaradıcılığı boyunca müxtəlif janrlarda, o cümlədən mənzərə və portret janrlarında əsərlər yaratmış, lakin dəfələrlə naturmort mövzusuna qayıtmışdır. Tarixən sənətdə təsəvvürsüz bir janr kimi diqqətdən kənarda qalmış naturmort, Sezanın gündəlik əşyalara diqqət yetirməsi ilə yeni yanaşma qazandı. O, xüsusilə meyvələrə maraq göstərir və onlardan əşyalar arasındakı uyğunluğu, eləcə də kompozisiyanın ahəngini və tarazlığını araşdırmaq üçün istifadə edirdi. Əşyalar təsadüfi yerləşdirilmiş kimi görünsə də, təsvirlər perspektivi sınaqdan keçirmək məqsədilə diqqətlə qurulurdu. Sezan sənətdə optikanın araşdırılmasına böyük maraq göstərirdi. Onun naturmort əsərləri həm əşyaların həndəsi formalarını, həm də gözlərimizin onları dəyişən şəkildə qavramasını öyrənmək vasitəsi idi. O, vizual təsvirin mürəkkəbliyini əks etdirmək üçün əşyaları müxtəlif perspektivlərdən təsvir etməyə çalışırdı. O yazırdı: "Təbiətdən rəsm çəkmək əşyanı köçürmək deyil, insanın duyğularını gerçəkləşdirməsidir". Sezanın özünəməxsus fırça işlətmə texnikası və təsvir etdiyi obyektləri təhrif etməsi XX əsrdə kubizm kimi yeni sənət üslublarının inkişafına təsir göstərmişdir. Təsvir Əsər öz adında göstərilən mövzunun formal təsviridir. Rəsmdə üzərində böyük saxsı bardaq, alma və portağallarla dolu meyvə vazası yerləşdirilmiş taxta masa təsvir olunur. Rəsmin sol tərəfində, naxışlı divarın qarşısından pərdə asılmışdır. Ağ parça masanın üzərinə sərilmiş, müxtəlif meyvələr isə onun büküşləri arasında yerləşdirilmişdir. Kompozisiya əşyaların konturlarının və simmetriyasının öyrənilməsini nümayiş etdirir. Saxsı bardaq, adi perspektiv qaydalarına zidd olan özünəməxsus şəkildə təsvir edilmiş və meyvələrin, eləcə də kompozisiyanın digər elementlərinin formalarına uyğunlaşdırılmışdır. Əşyaların zəngin rəngləri müxtəlif çalarların geniş diapazonundan istifadə edilməklə ayrı-ayrılıqda işlənmişdir. Mülkiyyət tarixi Əsər Pol Qogenə, daha sonra isə Ambroaz Vollara, Kornelis Hoqendeykə, Pol Rozenberqə, Albert C. Barnsa və Carroll Carstairs qalereyasına məxsus olmuşdur. 10 may 1999-cu ildə əsər Sotheby's tərəfindən Nyu-Yorkda 60 502 500 dollara satılmışdır. Bu, həmin vaxt üçün rekord qiymət idi və satış Uitni ailəsinin kolleksiyasının hərraca çıxarılması çərçivəsində keçirilmişdir. Milyarder Ken Qriffin əsəri şəxsi kolleksiyasına əlavə etmək üçün satın almışdır. Əsər daha sonra 1999-cu ilin avqustunda şəxsi satış yolu ilə açıqlanmayan məbləğə Stiv Uinə satılmışdır. Digər versiya Sezanın həmin ildə eyni ad altında çəkdiyi əsərin ikinci versiyası, onun şəxsi kolleksiyada saxlanılır. Həmçinin bax Ən bahalı rəsm əsərlərinin siyahısı İstinadlar Xarici keçidlər Artnet
https://az.wikipedia.org/wiki/P%C9%99rd%C9%99%2C_bardaq_v%C9%99_meyv%C9%99_vazas%C4%B1
https://www.cezannecatalogue.com/catalogue/entry.php?id=717
https://www.npr.org/2014/07/10/330159592/for-paul-cezanne-an-apple-a-day-kept-obscurity-away
https://web.archive.org/web/20220713085912/https://www.npr.org/2014/07/10/330159592/for-paul-cezanne-an-apple-a-day-kept-obscurity-away
https://www.nga.gov/educational-resources/sense-place-france/cezannes-still-lifes
https://www.moma.org/learn/moma_learning/paul-cezanne-still-life-with-apples-1895-98/
https://web.archive.org/web/20221024093732/https://www.moma.org/learn/moma_learning/paul-cezanne-still-life-with-apples-1895-98/
Tarix : 10 sentyabr 2026
