Opheodrys aestivus - Ümumi adı ilə kobud yaşıl ilan, Şimali Amerikada yayılmış zəhərsiz Colubridae fəsiləsinə aid bir ilan növü. Təsvir Kobud yaşıl ilan (Opheodrys aestivus) üstdən parlaq yaşıl, alt tərəfdən isə sarımtıl rəngdədir. Bu rənglər ona yaşıl bitkilər arasında əla kamuflyaj təmin edir və vəhşi təbiətdə görməyi çətinləşdirir, baxmayaraq ki, onlar yaşayış mühitlərində nisbətən geniş yayılıb. Bədəninin orta hissəsində 17 sıra halında düzülmüş qabarıq dorsal (bel) pulcuqları var. Ümumi uzunluğu (quyruq daxil olmaqla) 116 sm (45+3⁄4 düym) qədər ola bilər və çox incədir. Etimologiya Növün elmi adı olan aestivus, latın dilində "yay" mənasını verir və ilanın yaşıl bel rənginə istinad edir. Cins adı Opheodrys isə yunanca ophios (ilan) və drys (ağac) sözlərindən törəyib. Coğrafi yayılma Kobud yaşıl ilan ABŞ-nin cənub-şərqində, Floridadan şimala doğru sahil boyu Men, Indiana və qərbdə Mərkəzi Texasa qədər yayılıb. İlan əsasən Pidmont və Atlantik sahil düzənliklərində tapılır, lakin Apalaç dağlarının yüksək yerlərində rast gəlinmir. Həmçinin şimal-şərqi Meksikada, Tamaulipas və şərqi Nuevo León ştatlarında da mövcuddur. Yaşayış yeri və davranış O. aestivus-un üstünlük verdiyi yaşayış yerləri rütubətli çəmənliklər və meşəliklərdir, tez-tez su yaxınlığında tapılır. Yüksək dərəcədə ağacda yaşamağa uyğunlaşıb və kənar ərazilərdə sıx kolların olduğu dar ağac mikrohabitiatını üstün tutur. Bu mikrohabitat göl sahilləri, çay kənarları və yüksək yerlərdəki dərələr kimi müxtəlif mühitlərdə tapılır. Tez-tez aşağı bitkilərə dırmaşır və yaxşı üzür. Bununla belə, tez-tez yerdə də tapılır. Bir çox ilanlardan fərqli olaraq, əsasən gündüz fəaldır. Gecələr ağac budaqlarında bükülmüş vəziyyətdə olur. Qidalanma O. aestivusun əsas qidası həşəratlar və digər quru buğumayaqlılardır, lakin bəzi ilbizlər və ağac qurbağaları da yeyir. Bu ilan boğucu deyil; ovlarını tutub canlı şəkildə udur. O. aestivus-un əsasən vizual işarələrə güvəndiyi və canlı ovları üstün tutduğu müşahidə edilib. Çoxalma Kobud yaşıl ilanın erkəkləri təxminən 245 mm uzunluğa çatdıqda (2 yaşında) cinsi yetkinliyə çatır. Dişilər isə 1–2 yaşında və ya 350–400 mm uzunluğa çatdıqda yetkinləşir. Erkəklərdə plazma androgen səviyyələri və böyrəyin cinsi seqmentinin diametri bimodal dövrə malikdir. Kobud yaşıl ilan yazda, bəzən isə payızda çoxalır. Dişilər 2–14 yumurta qoyur, bəzən bir neçə dişi tərəfindən paylaşılan bir yuvada. Yumurtalar yazda qoyulursa, balalar avqust və ya sentyabrda çıxır və hər biri təxminən 18–20 sm (7.1–7.9 düym) uzunluğunda olur. Qorunma Kobud yaşıl ilan geniş yayılmışdır və ümumiyyətlə qorunma statusu narahatlıq doğurmur. Lakin şəhərləşmə, xüsusilə su yolları yaxınlığındakı bitki örtüyünün azalması, onların sayını azada bilər. Bir çoxu yollarda ölür və həşərat ovlarına tətbiq edilən pestisidlərdən zəhərlənə bilər. Öldükdə mavi rəng alır. Həmçinin Şimali Amerikada ən çox istismar edilən ev heyvanı ilanlarından biridir. Hər il yüzlərlə kobud yaşıl ilan yığılır.

İstinadlar

https://animaldiversity.org/accounts/Opheodrys_aestivus/

https://srelherp.uga.edu/snakes/rough-green-snake/

https://kysnakes.ca.uky.edu/snake/opheodrys-aestivus

https://www.outdooralabama.com/non-venomous-snakes/rough-green-snake

https://edisto.org/rough-green-snake/

https://ufwildlife.ifas.ufl.edu/snakes/roughgreensnake.shtml

https://dnr.illinois.gov/education/wildaboutpages/wildaboutsnakes/wasnfamilycolubridae/wasnroughgreensnake.html

Tarix : 7 fevral 2025

Əksi qeyd olunmayıbsa, bu məzmun CC BY-SA 4.0 çərçivəsində yayımlanır.