Norfolk teryeri - ingilis it cinsi. 1964-cü ildə müstəqil bir cins kimi tanınmazdan əvvəl, Norviç teryerinin bir növü hesab edilirdi. Norfolk və Norviç teryerləri birlikdə işləyən teryerlərin ən kiçikləridir. Təsviri Tel tüklü xəz örtüyünə malikdir. Milli it klublarının cins standartlarına əsasən, bu örtük qırmızı, buğdayı, qara, qara-qəhvəyi və ya boz çalarlarda ola bilər. İşləyən teryerlərin ən kiçiyidir. Onlar çox aktivdir və yığcam quruluşa malikdirlər. Çevik hərəkət edir və güclü sümük quruluşuna sahibdirlər. Bu cins nə çox ağır, nə də çox zərif olmalıdır. Çox ağır it çeviklikdən məhrum olar, çox zərif it isə oyuncaq cinsinə çevrilə bilər. Norfolk teryerlərinin ön və arxa hissələrinin balanslı olması və nisbətən uzun bel hissəsi onların yan yerişini yaxşılaşdırır. İdeal boyu 23-25 sm, çəkisi isə təxminən 5.0-5.4 kq arasındadır. Xarakteri Özünə güvənən itlərdir və quyruqlarını dik tutaraq hərəkət edirlər. Onlar müstəqil xarakterə sahibdir. Digər itlərlə yaxşı yola gedir və insanlara, xüsusilə uşaqlara qarşı sevgi dolu davranırlar. Onların fəaliyyət səviyyəsi ümumiyyətlə ətraf mühitin tempinə uyğunlaşır. Onlar adətən qazma işləri ilə məşğul olmur, lakin uzun müddət tək qaldıqda müəyyən dağıdıcı vərdişlər qazana bilərlər. Norfolklar həddindən artıq hürən itlər deyil, lakin lazım olduqda xəbərdarlıq edirlər. Düzgün sosiallaşdıqları təqdirdə, digər ev heyvanları ilə yaxşı yola gedirlər. Norfolk teryerləri əvvəlcə anbar zərərvericilərindən qurtulmaq üçün anbar itləri kimi yetişdirilib. Onlar bəzən kiçik heyvanların ovlanmasında istifadə edilirdi. Sağlamlıq 2024-cü ildə Böyük Britaniyada aparılan bir araşdırmaya görə, Norfolk teryerlərinin orta ömrü 13,5 ildir. Cinsdə mitral qapaq xəstəliyi, diz qapağı çıxığı və diş problemləri müşahidə edilə bilər. Norfolkların çox vaxt dayaz omba yuvaları olur və bəzi itlərdə omba displaziyası görülür. Qulluq Tükləri gündəlik polad daraqla daranmalıdır. Ən azı həftədə bir dəfə xəz diqqətlə daransa və ildə iki dəfə əl ilə təmizlənsə, keyfiyyəti qorunacaqdır. Norfolkların tükləri yalnız qayçı ilə qısaldılmalıdır. Çirkli olduqda it şampunu ilə yuyula bilərlər. Tarixi 1880-ci illərdə İngiltərənin Şərqi Angliya bölgəsində Norfolk teryerlərinin ilkin formaları inkişaf etdirildi. Bu itlərin kiçik, qısa ayaqlı İrlandiya teryerləri və digər yerli teryerlərlə qohumluğu olduğu düşünülür. İlk dəfə Kembric Universiteti tələbələri tərəfindən saxlanılan bu itlərə "Cantab Terrier" adı verilmişdi. Daha sonra isə Trumpington küçəsində bir tövlədə yetişdirildiyi üçün "Trumpington Terrier" adlandırıldılar. Birinci Dünya Müharibəsindən əvvəl Frank Cons adlı bir irlandiyalı bu itlərin bir çoxunu ABŞ-a satdı və onlar orada "Jons Terrier" kimi tanındı. 1932-ci ildə Norviç teryerləri İngilis Kennel Klubu tərəfindən tanındı. 1964-cü ildə isə qulaqları qatlanmış növ müstəqil cins olaraq Norfolk Teryer adını aldı. ABŞ və Kanada Kennel Klubları bu cinsin bölünməsini 1979-cu ildə tanıdılar.
https://en.wikipedia.org/wiki/Norfolk_Terrier
https://dogtime.com/dog-breeds/norfolk-terrier
https://www.akc.org/dog-breeds/norfolk-terrier/
https://www.thekennelclub.org.uk/search/breeds-a-to-z/breeds/terrier/norfolk-terrier/
https://www.petmd.com/dog/breeds/norfolk-terrier
https://www.purina.co.uk/find-a-pet/dog-breeds/norfolk-terrier
https://www.dogster.com/dog-breeds/norfolk-terrier
https://www.hillspet.com/dog-care/dog-breeds/norfolk-terrier
Tarix : 3 yanvar 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
