Məsumların qətliamı — Piter Paul Rubensin Bibliyada Məsumların qətliamı kimi təsvir olunan və İncilin Əhdi-Cədidində Mattanın nəql etdiyi Müjdədə (2:13–18) bəhs edilən, Bet-Lexemdəki hadisəni təsvir edən iki rəsm əsərinin adıdır. Birinci əsər 142 × 182 sm ölçüdədir və Rubensin səkkiz il İtaliyada qaldıqdan sonra 1608-ci ildə doğma Antverpen şəhərinə qayıtmasından sonra çəkilmişdir. Birinci rəsm Rubensin çəkdiyi birinci versiya təxminən 1611–1612-ci illərə aiddir. XVII əsrin sonunda rəsm Lixtenşteyn kolleksiyasının tərkibinə Vyana, Avstriyada, Rubensin digər əsəri Samson və Delila ilə birlikdə daxil oldu. Forchondt qardaşları hər iki əsəri 1700-cü illərdə atası Karl Eysebius, Lixtenşteyn knyazı vasitəsilə tanıdıqları I Hans-Adam, Lixtenşteyn knyazına satdılar. Rəsmlərə Lixtenşteyn ailəsinin möhürü vurulmuşdu və XIX əsrə qədər kolleksiyada qeydə alınmışdı. 1815-ci ildə çəkilmiş rəsmlər onların Vyanadakı Bağ sarayında yan-yana asıldığını göstərir. 1767-ci ildə Vincenzio Fanti tərəfindən Franciscus de Neve (II) əsəri kimi kataloqlaşdırıldıqdan sonra, Məsumların qətliamı 1780-ci ilə aid və anonim şəkildə hazırlanmış Lixtenşteyn kolleksiyası inventarında Rubensin köməkçilərindən biri olan Jan van den Hoeckeyə aid edilmiş və Rubensdən sonra kimi qeyd olunmuşdur. Əsərin kompozisiyası artıq Rubens emalatxanasının əsəri olduğu düşünülən bir nüsxədən məlum idi. Bu nüsxə 1902-ci ildə Belçika Kral Təsviri İncəsənət Muzeyləri tərəfindən Brüsseldə Antoon Sallaertın əsəri kimi satın alınmışdı. Bu atribusiya ilə əsər 1920-ci ildə avstriyalı bir ailəyə satılana qədər orada qaldı. Daha sonra 1923-cü ildə Avstriyanın şimalında yerləşən Stift Reichersberg monastırına borca verildi. 2001-ci ildə rəsm Sotheby'sin Londondakı flamand və niderland rəssamlığı üzrə mütəxəssisi Corc Qordon tərəfindən görüldü. O, əsərin həmin dövrdə çəkilmiş Samson və Delila ilə oxşar xüsusiyyətlərinə və üslubuna əsaslanaraq onun həqiqətən də Rubensə məxsus olduğuna əmin oldu. Əsər 10 iyul 2002-ci ildə Londonun Sotheby's hərracında 49,5 milyon funt sterlinqə (C$117 milyon) kanadalı iş adamı və incəsənət kolleksiyaçısı Kennet Tomsona satıldı. Hərracdan sonra rəsm bir müddət London Milli Qalereyasına borc verilmiş, daha sonra 2008-ci ildə Ontario İncəsənət Qalereyasına köçürülmüşdür. Tomson əsəri həmin qalereyaya bağışlamışdı və qalereya həmin illərdə əsaslı yenidənqurma və genişləndirmə işləri aparırdı. Sonrakı versiyalar Ömrünün sonlarına yaxın, 1636–1638-ci illər arasında Rubens Məsumların qətliamı əsərinin ikinci versiyasını çəkmişdir. Bu versiya 1706-cı ilə qədər Köhnə Pinakotekin kolleksiyasına daxil edilmiş və hazırda da Münhendə həmin muzeydə saxlanılır. Bu sonrakı versiyanın surəti 1643-cü ildə Paulus Pontius tərəfindən qravüra şəklində hazırlanmışdır. Təhlil Əsər geniş şəkildə rəssamın 1600–1608-ci illər arasında İtaliyada keçirdiyi dövr ərzində qazandığı biliklərin nümayişi hesab olunur. Rubens burada barokko dövrünün italyan rəssamlarının, məsələn, Karavacconun əsərlərini bilavasitə müşahidə etmişdi. Bu təsirlər rəsmdə səhnənin güclü dramatizmi və emosional dinamizmi, eləcə də zəngin rəng çalarları vasitəsilə görünür. Əsərdə kler-obyurdan istifadə edildiyi də görünür. O, həmçinin bədənin necə qurulduğunu öyrənmək üçün dərisi çıxarılmış anatomik heykəllər olan ekorşe fiqurlarından istifadə etmişdir. Kontekst Rubensin mövzuya həsr etdiyi ilk əsəri çəkdiyi dövrdə Antverpen cəmi bir neçə il əvvəl müharibədə iştirak etmişdi; münaqişə 1609-cu il barışığı ilə müvəqqəti olaraq dayandırılmışdı. Yalnız bir il ərzində Niderlanda hakim olan ispan qüvvələri, protestant ordularını geri oturtmağa çalışarkən 8 000-dən çox vətəndaş həm kalvinistlər, həm də katoliklər tərəfindən öldürülmüşdü. Qətliamlar Antverpendə reallıq idi; şəhərdən 160 km şimalda yerləşən Haarlemdə protestant üsyançıların lideri Maurits van Nassau eyni səhnəni Cornelis van Haarlemə Haarlem şəhər meriyasının binası üçün çəkməyi sifariş etmişdi — bu, ispanların niderlandlılara qarşı törətdiyi vəhşiliklərdən bəhs edən təbliğat xarakterli əsər idi. Bununla belə, Antverpen katoliklərin mühüm qalası olaraq qaldı və əks-reformasiya düşüncəsinin aparıcı mərkəzinə çevrildi. 2022-ci ilin avqustunda Letzte Generation qrupunun üç üzvü Münhendəki Köhnə Pinakotekdə aksiya keçirdi: iki fəal Rubensin əsərlərindən birinin çərçivəsinə özlərini yapışdırdı, üçüncüsü isə aksiyanı lentə aldı. Nümayiş nəticəsində 11 000 avro məbləğində zərər dəydi (kətan zədələnməsə də, çərçivə zərər görmüşdü). 2023-cü ilin mayında onların hər biri 2 400 avro cərimə ödəməyə məhkum edildi. Həmçinin bax Ən bahalı rəsm əsərlərinin siyahısı Qeydlər Xarici keçidlər Vikianbarda Məsumların qətliamı (Rubens) ilə əlaqəli mediafayllar var. BBC News məqaləsi — hərrac haqqında ART "4" "2"-DAY məqaləsi
https://az.wikipedia.org/wiki/M%C9%99sumlar%C4%B1n_q%C9%99tliam%C4%B1_%28Rubens%29
https://rkd.nl/en/explore/images/58395
http://web.archive.org/20220307203417/https://rkd.nl/en/explore/images/58395
https://rkd.nl/en/explore/images/116187
https://web.archive.org/web/20230620163654/https://rkd.nl/en/explore/images/116187
http://www.suebond.co.uk/events/release.php?eventid=289
http://web.archive.org/20230620115950/http://www.suebond.co.uk/events/release.php?eventid=289
Tarix : 10 sentyabr 2026
