Mavi Lasi (ing. Blue Lacy Dog) - 19-cu əsrin ortalarında ABŞ-nın Texas ştatında yaranan işçi it cinsi. İlk dəfə 2001-ci ildə "Texas Senatı" tərəfindən tanınan bu cins, 436 saylı Senat Qərarında "əsl Texas cinsi" kimi qiymətləndirilib. 2005-ci ilin iyun ayında isə Texasın qubernatoru Rik Perri, Mavi Lasi cinsini "Texasın Rəsmi Dövlət İt Cinsi" olaraq qəbul edən qanunu imzalayıb. Gözlənildiyi kimi, Mavi Lasi itlərinin böyük əksəriyyəti Texasda tapılsa da, cinsin daha geniş tanınması ilə ABŞ-nın bir çox bölgələrində, Kanada və ən son Avropada da damazlıq populyasiyaları yaradılıb. Görünüş Mavi Lasi itləri güclü, sürətli və yüngüldür. Boy-çəki nisbətində mütənasib olan cinsdir. Boyları 43 ilə 56 sm arasında dəyişir. Boydan və ümumi kondisiyadan asılı olaraq, dişilərin çəkisi 11-20, erkəklərin çəkisi isə 16-25 kq olmalıdır. Mavi Lasi itləri tez-tez "mavi" adlandırılsa da, cinsin üç icazə verilən rəng çeşidi vardır: 1. "Mavi": Rəngləri açıq gümüşdən tünd kömürə qədər dəyişə bilər. 2. "Qırmızı": Rəngləri yüngül kremdən pasa qədər dəyişir. 3. "Three": Mavi üzərində qırmızı işarələr və sinəsində çənədən qasığa qədər uzanan ağ rəng mövcuddur. Ağ rəng bir və ya bir neçə pəncədə də ola bilər. İtlərin gözləri kəskin və ayıqdır, rəngləri isə parlaq sarıdan zəngin kəhrəbaya qədər dəyişir. Kürk Mavi Lasi itlərinin kürkü qısa, hamar və sıx tüklərdən ibarət olmalıdır. Həddindən artıq uzun tüklü və ya kobud kürk diskalifikasiyadır. Mavi Lasi itlərinin tükləri tökülür, lakin minimal baxım tələb edir. Temperament Mavi Lasi itləri ağıllı, intensiv, aktiv və ayıqdır. Həm ovçuluq, həm də çoban itləri olaraq inkişaf etdirilən bu cins, böyük itlərlə işləmək və mal-qaraya nəzarət etmək üçün böyük idarəetmə və qətiyyət nümayiş etdirir. Gənc itlərin enerjisi kiçik uşaqlar üçün narahatlıq yarada bilər. Mavi Lasi itlərinə məşq etmək asandır, yeni bacarıqları tez öyrənirlər. İşçi cins olduğundan, onlara verilən tapşırıqları yerinə yetirərkən daha yaxşı nəticə verirlər. Onlar xüsusilə mal-qaranı idarə etmək, qan qoxusun izləmək və çöl donuzlarını ovlamaqda üstün bacarığa sahibdirlər. Sürü idarəetmə instinktləri və məşq qabiliyyəti, testlərdə ölçülə bilər. Son illərdə, Mavi Lasi itləri həmçinin itirilmiş ov heyvanlarını tapmaq üçün istifadə olunan izləmə bacarıqları ilə tanınır. Onlar Amerika Birləşmiş Ştatlarının tələ quran ovçuları tərəfindən xilasetmə və təqib əməliyyatlarında da istifadə olunur. Sağlamlıq Mavi Lasi itləri ümumiyyətlə sağlam itlərdir. Fermerlərin və ovçuların tələblərinə cavab vermək üçün nəsillər boyunca hazırlanmış bu cins, Texasın sərt ərazilərinə, çətin iş şəraitinə və həm isti, həm də soyuq havaya tab gətirəcək qədər möhkəmdir. Tarix Mavi Lasi iti, 1858-ci ildə Kentukki ştatından Texasın Burnet qraflığına köçən Lasi qardaşlarının (Evin, Frank, Harri və Corc) şərəfinə adlandırılmışdır. Onların yetişdirdiyi itlərin tazılar, ətirli itlər və koyotlarla qarışdığı deyilir. Lasi ailəsi, həmçinin Texasın Ostin şəhərində, Texas ştatının Kapitol binasının tikintisi üçün Qranit dağındakı fermanın karxanasından çəhrayı qranit bağışlayıb və beləliklə, ailə və itləri Texas tarixində əhəmiyyətli fiqurlar olaraq qeyd olunub. 15 mart 2005-ci ildə nümayəndə Xuakin Kastro, "Nümayəndələr Palatasının 108 saylı Konkurent Qətnaməsi"ni təqdim edərək, Mavi Lasi itini Texas ştatının rəsmi iti kimi təklif edib. Bu qətnamə, Mavi Lasi ailəsini və onların Texas ştatına verdiyi töhfələri tanıtmaq, həmçinin Mavi Lasi itini Texasın orijinal cinsi kimi şərəfləndirmək məqsədini daşıyırdı. Nümayəndələr Palatası bu təklifi 15 may 2005-ci ildə qəbul edib, Senat isə 25 may 2005-ci ildə təsdiqləyib. Nəhayət, Qubernator Rik Perri 18 iyun 2005-ci ildə bu qanunu imzalayaraq, Mavi Lasi itini Texasın simvolu olaraq qəbul edib.
https://en.wikipedia.org/wiki/Blue_Lacy
https://a-z-animals.com/animals/blue-lacy-dog/
https://dogtime.com/dog-breeds/blue-lacy
https://www.petmd.com/dog/breeds/blue-lacy
https://www.dogbreedinfo.com/bluelacy.htm
https://www.wisdompanel.com/en-us/dog-breeds/lacy-dog
https://www.dogster.com/dog-breeds/blue-lacy
https://ckcusa.com/breeds/blue-lacy/
https://nationalkennelclub.com/blue-lacy/
https://www.rover.com/blog/blue-lacy-texas-state-dog/
Tarix : 29 dekabr 2024
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
