Mavi-boğazlı milçəkqapan ("Cyanoptila cyanomelana") - "Muscicapidae"yə aid olan köçəri, oxuyan quş növü. Bu növ həmçinin "Yapon milçəkqapanı" kimi də tanınır. O, Yaponiya, Koreya, Çin şimal-şərqi və Rusiyanın Uzaq Şərq bölgələrində çoxalır. Qışı isə Cənub-Şərqi Asiyada, xüsusilə Vyetnam, Kamboca, Tailand, Sumatra və Borneo kimi yerlərdə keçirir. Bu növ 2014-cü ildə Şri-Lankanın Sinharaja yağış meşəsində nadir hallarda müşahidə edilmişdir. Taksonomiya və etimologiya Bu növ ilk dəfə 1829-cu ildə Koenraad Yakob Temminck tərəfindən "Muscicapa cyanomelana" binominal adı ilə təsvir edilmişdir. Hazırda isə "Cyanoptila" cinsində yerləşir və Zappey milçəkqapanı ilə yanaşı mövcuddur. Əvvəllər bu iki növ eyni takson kimi qəbul edilirdi. Cinsin adı qədim yunan dilindəki "kuanos" (tünd mavi) və "ptilon" (lələk) sözlərindən götürülmüşdür. "Cyanomelana" epiteti isə "kuanos" və "melas, melanos" (qara, tünd) sözlərinin birləşməsindən yaranıb. Yarımnövlər İki tanınmış yarımnöv mövcuddur: -"C. c. cyanomelana" (Temminck, 1829) – Yaponiya və cənubi Kuril adalarında çoxalır, qışı Myanma, Tailand və Böyük Sunda adalarına qədər uzanır. -"C. c. intermedia" (Weigold, 1922) – Çin şimal-şərqində (Heyluntszyandan şərqi Xebeyə qədər), Rusiyanın cənub-şərqində (Amur vilayəti və Primorski diyarı) və Koreya yarımadasında çoxalır, qışı Myanma, Tailand və Böyük Sunda adalarına qədər uzanır. Təsvir Mavi-boğazlı milçəkqapan iri (16–17 sm uzunluqda, orta hesabla 25 qram ağırlığında) və gözəl bir milçəkqapandır. Erkək fərdlərin rəngi tünd kobalt mavisidir, üz hissəsindən sinənin yuxarı hissəsinə və yan tərəflərə qədər qara rəng hakimdir. Qarın hissəsi isə ağ rəngdədir. Ağ rəng quyruq lələklərinin xarici hissəsində də görünür. Cavan erkək fərdlərdə qanadlar mavi, digər hissələr isə qəhvəyi rəngdədir. Dişi fərdlər orta hesabla erkəklərdən kiçik olur. Baş, üz və üst hissələr boz-qəhvəyi, boğazın aşağı hissəsi isə açıq bej-ağ rəngdədir. Cavan erkəklər dişilərə çox bənzəyir. Dişi fərdlərin başı digər qəhvəyi milçəkqapanlara nisbətən daha kiçikdir. Onların mahnısı qısa və kədərli səslənən fit səslər ardıcıllığıdır. Yaşayış yeri Mavi-boğazlı milçəkqapanlar əsasən düzənlik və təpəlik meşələrdə (taqa, meşəli yamaclar və dərələr daxil olmaqla) 1200 metr yüksəkliyə qədər çoxalır. Həmçinin çay kənarı kolluqlarında və plantasiyalarda da rast gəlinir. Çoxalma mövsümündən kənarda sahil meşələri, kolluqlar, parklar və bağlarda, Borneoda isə 1850 metr yüksəkliyə qədər olan meşəli təpələrdə, dağətəyi meşələrdə, plantasiyalarda və qismən qırılmış meşələrdə qışlayır. Bu milçəkqapanlar ən çox səhər vaxtı fəal olurlar. Çoxalma Çoxalma mövsümü mayın sonundan avqustun əvvəlinə qədər davam edir. Əsasən mamırdan hazırlanan yuvalar qayalıq yarıqlarında, ağac kökləri arasında, çay kənarlarında, ağac oyuqlarında və nadir hallarda tərk edilmiş binalarda yerləşir. Yuva 4-6 yumurta ilə qurulur və yumurtalar yalnız dişi tərəfindən 14-15 gün müddətində inkubasiya edilir. Dişi fərdlər balalara qulluq etmək üçün erkəklərdən daha çox vaxt və enerji sərf edir. Yuva parazitləri arasında şimal qızquşu, adi ququ və kiçik ququ da daxildir. Qidalanma Əsasən həşəratlar və onların sürfələri ilə qidalanır, həmçinin giləmeyvələr, o cümlədən "pokeweed" də yeyir. Status Növün populyasiyası azalmaqda olsa da, geniş yayılması və ehtimal olunan böyük sayına görə "Beynəlxalq Təbiəti Mühafizə İttifaqı"nın (IUCN) Qırmızı Siyahısında "Az Riskli" kimi təsnif edilmişdir.
https://ebird.org/species/bawfly2
https://en.wikipedia.org/wiki/Blue-and-white_flycatcher
https://singaporebirds.com/species/blue-and-white-flycatcher/
https://datazone.birdlife.org/species/factsheet/blue-and-white-flycatcher-cyanoptila-cyanomelana
https://xeno-canto.org/species/cyanoptila-cyanomelana
https://birdsoftheworld.org/bow/species/bawfly2/cur/introduction
https://www.inaturalist.org/taxa/13258-Cyanoptila-cyanomelana
https://www.oiseaux-birds.com/card-blue-white-flycatcher.html
https://avibase.bsc-eoc.org/species.jsp?avibaseid=B7679B3FBF987992
https://www.oiseaux.net/birds/blue-and-white.flycatcher.html
Tarix : 14 fevral 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
