Lilian sevgi quşu (Agapornis lilianae) - Həmçinin "Nyasa sevgi quşu" kimi də tanınan, sevgi quşları cinsinə aid kiçik bir Afrika tutuquşu növü. Ümumi məlumat Əsasən yaşıl rəngdədir, üst sinə və baş hissəsində narıncı rəng var. 13 sm (5 düym) uzunluğundadır və Afrika qitəsindəki ən kiçik tutuquşu növüdür. Qapalı şəraitdə nadir rast gəlinir və çoxalması çətindir. Təsvir Lilian sevgi quşu 13 sm (5 düym) uzunluğundadır və əsasən yaşıl rəngdədir, göz ətrafında ağ halqalar var. Baş, boyun və üst sinə hissəsində narıncı rəng, bel hissəsi isə yaşıl rəngdədir. Erkək və dişi fərdlər xarici görünüş etibarilə eynidir. Lilian sevgi quşu tez-tez ondan bir qədər böyük olan "Fişer sevgi quşu" ilə qarışdırılır. Fişer sevgi quşunun baş hissəsi zeytun-yaşıl, bel hissəsi isə mavi rəngdədir. Lilian sevgi quşu həmçinin "çəhrayıüzlü sevgi quşu" ilə də bənzəyir, lakin çəhrayıüzlü sevgi quşunun narıncı rəngi daha aydın şəkildə fərqlənir və göz ətrafında ağ halqa yoxdur. Qidalanma Lilian sevgi quşları ot toxumları, darı, yabani düyü, çiçəklər və digər növlərin toxum və meyvələri ilə qidalanır. Çoxalma Lilian sevgi quşlarının çoxalma mövsümü yanvardan marta qədər və iyun-iyul aylarıdır. Ağac yarıqlarında damlı yuva qururlar. Qapalı şəraitdə bir dəstədə üç ilə səkkiz ağ yumurta olur, yumurtalar təxminən 22 gün inkubasiya edilir və balalar yumurtadan çıxdıqdan təxminən 44 gün sonra yuvadan çıxır. Yayılması və yaşayış mühiti Lilian sevgi quşları Malavi, Mozambik, Tanzaniya, Zambiya və Zimbabvedə endemikdir. 2004-cü ildə təbiətdə saylarının 20,000-dən az olduğu təxmin edilmişdir. Hazırda əsasən "Livonde Milli Parkı"nda (LNP) yaşayır və parkın ətrafındakı meşələrdə də kiçik qruplar halında tapılır. Onların yayılması getdikcə "Livonde Milli Parkı" ilə məhdudlaşır, çünki qidalanma və çoxalma mühitləri kənd təsərrüfatı məqsədləri üçün istifadə olunur. "Livonde Milli Parkı" xaricində qalan yaşayış mühitləri parçalanmış "Miombo" meşə qoruqlarıdır, lakin bu ərazilərdə məhv olan mühitin dəqiq ölçüsü elmi cəhətdən müəyyən edilməmişdir. Təhlükələr "Livonde Milli Parkı" Malavinin cənub bölgəsində yerləşir və bu bölgə ölkənin ən yüksək insan əhalisi sıxlığına malikdir (təxminən 100-115 nəfər/km²). "Livonde Milli Parkı" əhali artımı və kənd təsərrüfatı fəaliyyətləri səbəbindən digər milli parklara nisbətən daha çox təsirlənir. Son zamanlar Lilian sevgi quşlarının zəhərlənməsi halları artmışdır, baxmayaraq ki, bu quşların niyə zəhərləndiyi məlum deyil. Lilian sevgi quşları üzrə tədqiqatçılar, brakonirlərin daha böyük məməliləri zəhərləmək istədiyini və sevgi quşlarının təsadüfən zəhərləndiyini güman edirlər. Ömür uzunluğu və sağlamlıq problemləri Lilian sevgi quşlarının ömür uzunluğu 10-12 ildir. Bu növ üçün əsas sağlamlıq problemi tənhalıqdır. Bu quşlar ömürlük cütləşirlər. Oxşarlıqlar Lilian sevgi quşunun mitoxondrial geni çəhrayıüzlü sevgi quşu ilə uyğun gəlir. Qapalı şəraitdə yetişdirilməsi Lilian sevgi quşları qapalı şəraitdə yetişdirilməsi çətin olan bir növdür. Dünya üzrə bir çox yetişdirici bu növü çoxaltmaqda çətinlik çəkir.
https://en.wikipedia.org/wiki/Lilian%27s_lovebird
https://ebird.org/species/lillov1
https://avibase.bsc-eoc.org/species.jsp?avibaseid=3EBFC893EEB1C94E
https://www.inaturalist.org/taxa/19073-Agapornis-lilianae
https://parrots.org/encyclopedia/lilians-lovebird/
https://xeno-canto.org/species/agapornis-lilianae
https://animalia.bio/lilians-lovebird#google_vignette
Tarix : 11 mart 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
