Kenquru siçanı - ABŞ-ın cənub-qərbindəki çöl ərazilərinə aid olan, xüsusi tullanma bacarığı və ikiayaqlı hərəkət etmə vərdişi ilə tanınan kiçik gəmiricilər. Əsasən Nevada ştatında rast gəlinir. Kenquru siçanının adı, bu siçanların qeyri-adi tullanma qabiliyyətinə və ikiayaqlı hərəkət etmə vərdişinə istinad edir. Kenquru siçanları, eyni "Dipodomyinae" altfəsiləsinə aid olan kenquru siçovulları ilə yaxından əlaqəlidir. Növləri 1. Qara kenquru siçanı ("Microdipodops megacephalus") 2. Ağ kenquru siçanı ("Microdipodops pallidus") Hər iki növ çöl sahələrində, əsasən qumlu ərazilərdə yaşayır. Onlar toxumlar və bitkilərlə qidalanır. Qara kenquru siçanı bəzən həşəratlar və ölü heyvanlarla da qidalanır. Kenquru siçanları nadir hallarda su içir, bunun əvəzinə, yediyi qidalardan metabolik olaraq su əldə edir. Onlar qida toplayır və yuvalarında saxlayırlar. Bu yuvalar 1-2.5 metr uzunluğunda ola bilər. Yaşayış və davranış Kenquru siçanları gecə aktivdir və gün batdıqdan sonra ilk iki saat ərzində daha fəal olurlar. Soyuq hava zamanı hibernasiya (Qış yuxusu) etdikləri düşünülür. Siçanlar mürəkkəb yuvalar qurur, burada həm qida saxlayır, həm də 2-7 arası bala yetişdirirlər. Ağ kenquru siçanı yalnız incə qumda yuva qurur, qara kenquru siçanı isə daha çox daşlı torpaqlarda yaşamağı üstün tutur, amma qumda da yuva qura bilir. Bu siçanlar hibernasiya etməyə meyllidir və gecə ov etdiyi üçün gün ərzində nadir hallarda görünürlər. həmçinin Kenquru siçanlarının gündüz yırtıcılardan qaçmaq üçün gecə aktiv olması onları təhlükələrdən qoruyur. Mitoxondrial məlumatlara əsasən, bu siçanların populyasiyalarının genetik olaraq sabit olduğu və zamanla ciddi genetik dəyişikliklərə uğramadığı görünür. Böyük Hovuz Səhrasındaki təhdidlər səbəbilə kiçik və həssas altpopulyasiyaların sağ qalması ilə bağlı narahatlıqlar mövcuddur. Fərqli xüsusiyyətlər Ağ və qara kenquru siçanları arasında əsas fərq, onların tük rəngidir. Qara kenquru siçanı tünd qəhvəyi və ya qaradır, ağ kenquru siçanı isə daha açıq, sarımtıl-qəhvəyi rəngə malikdir. Hər iki növün ümumi xüsusiyyətləri: 1. Böyük gözlər - gecə görmə qabiliyyətini artırır. 2. Uzun və ipək kimi tüklər. 3. Qısa ön ayaqlar və uzun arxa ayaqlar 4. Uzun və incə quyruq - balans üçün istifadə olunur, quyruğun ucunda tük var 5. Böyük qulaq strukturu - yaxşı eşitməni təmin edir. Bir yetişkin kenquru siçanı təxminən 13.5 qram ağırlığında olur, ümumi uzunluğu təxminən 158.5 mm-dir və quyruq uzunluğu ortalama 84 mm-dir. Başlarının ölçüsü, böyük eşitmə orqanları səbəbindən bədənlərinə nisbətən daha böyükdür, bu da onların yırtıcılara qarşı həssaslığını artırır. Qidalanma Kenquru siçanları ot yeyən (qranivor) gəmiricilərdir və əsasən toxumlar, çiçəklər və qozalarla qidalanırlar. Yayda, həşəratlar da yeyə bilərlər. Onlar qabaq dişlərindən istifadə edərək toxumları qabığını qırır, sonra həmin toxumları yanaqlarındakı tüklü kisələrində daşıyır və yuvalarına aparırlar. Kenquru siçanlarının diqqətəlayiq xüsusiyyəti, su içmədən uzun müddət sağ qala bilmələridir. Bu, onların çox səmərəli böyrəkləri və qida vasitəsilə kifayət qədər su əldə etmə qabiliyyətləri sayəsində mümkündür. Yediyi qidalardan qazandıqları yağları quyruqlarında saxlayırlar. Yırtıcılar Kenquru siçanlarının tük rəngi, onların çöl mühitində yırtıcılardan qorunmasına kömək edir. Onların mürəkkəb yuva sistemi və yüksək frekanslı siqnal vermək qabiliyyətləri də təhlükə zamanı onları qoruyur. Kenquru siçanlarının bilinən düşmənlərinin bir neçəsi bunlardır: 1. Koyotlar ("Canis latrans") 2. Sovsarlar ("Mustelidae") 3. Bayquşlar ("Strigidae") 4. Zəhərli ilanlar ("Crotalus") 5. Tülkülər ("Vulpes") 6. Porsuqlar ("Taxidea taxus")
https://en.wikipedia.org/wiki/Kangaroo_mouse
https://a-z-animals.com/animals/kangaroo-mouse/
https://www.britannica.com/animal/kangaroo-mouse
https://animaldiversity.org/accounts/Microdipodops_pallidus/
https://www.inaturalist.org/taxa/44161-Microdipodops
https://www.britannica.com/animal/dark-kangaroo-mouse
https://www.ndow.org/species/dark-kangaroo-mouse/
https://animalia.bio/pale-kangaroo-mouse
https://www.nps.gov/orpi/learn/nature/kangaroo-rat.htm
Tarix : 28 dekabr 2024
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
