İkitos milçəkqapanı ("Polioptila clementsi") - "Polioptilidae" fəsiləsinə aid olan bir quş növü. Ümumi məlumat İlk dəfə 2005-ci ildə təsvir edilmişdir. Bu növ yalnız Perunun İkitos şəhərinin qərbində yerləşən "Allpahuayo-Mişana Milli Qoruğu"nda tapılmışdır. Təsnifat və sistematika İkitos milçəkqapanı, Qvian milçəkqapanı ("Polioptila guianensis") kompleksinə daxildir. 2006-cı ilin iyul ayında "Amerika Ornitologiya Cəmiyyəti"nin "Cənubi Amerika Təsnifat Komitəsi" (SACC/AOS) və digər taksonomik qurumlar tərəfindən yeni növ kimi qəbul edilmişdir. Lakin "BirdLife International" (BLI) onu yalnız Qvian milçəkqapanının yarımnövü kimi tanıyır. Növün elmi adı, amerikalı ornitoloq Ceyms F. Klementsin şərəfinə verilmişdir. Təsvir İkitos milçəkqapanının bütün nümunələri cavan fərdlər olmuşdur, buna görə də yetkin fərdlərin lələkləri rəsmi şəkildə təsvir edilməmişdir. Lakin yetkin fərdlərin müşahidələri göstərmişdir ki, onların lələkləri cavan fərdlərdən fərqlənmir. Cavan fərdlərin uzunluğu 11 sm, çəkisi isə 5-6 qramdır. Erkək fərdlərin başının üstündən quyruğuna qədər olan üst hissəsi tünd boz rəngdədir. Dar və qırıq ağ göz halqası var. Boğazı və sinəsi orta boz, qarın hissəsi isə ağ rəngdədir. Quyruğunun daxili lələkləri qara, xarici lələkləri isə təxminən 80% ağ rəngdədir, aralıq lələklər isə qarışıq rəngdədir. Yayılması və yaşayış yeri İkitos milçəkqapanının yeganə məlum populyasiyası Perunun İkitos şəhərinin qərbində yerləşən Allpahuayo-Mişana Milli Qoruğundadır. Qoruq, "Napo rütubətli meşəsi" və "İkitos varzea" ekoregionlarının sərhədində yerləşir. Bu ərazinin yüksəkliyi 150 metrdir. Qidalanma İkitos milçəkqapanının qidalanması haqqında çox az məlumat var, lakin digər "Polioptila" milçəkqapanları kimi əsasən həşəratlarla qidalandığı güman edilir. Ağacların yuxarı hissələrində qarışıq növlərdən ibarət dəstələrlə fəal şəkildə qidalanır, adətən budaqların uclarından həşəratları toplayır və bəzən uçan həşəratları tutmaq üçün qısa uçuşlar edir. Çoxalma İkitos milçəkqapanının yuvası, yumurtaları və çoxalma davranışı hələ təsvir edilməmişdir. Səs və çağırışlar İkitos milçəkqapanının mahnısı "ayrı-ayrı iki hissədən ibarət bir sıra"dır. Həmçinin müxtəlif çağırışları var. Status "BLI" İkitos milçəkqapanını ayrı bir növ kimi tanımadığı üçün "IUCN" onun statusunu, Qvian milçəkqapanı kompleksindən ayrıca qiymətləndirməyib. Onun yeganə məlum yayılma arealı təxminən 2000 hektardır və bu ərazidə meşə kəsilməsinə icazə verilir. Populyasiyası 250-dən az yetkin fərddən ibarətdir. Bu məlumatlar və "xüsusi ağ qum meşəsi yaşayış yerinin davamlı itirilməsi" İkitos milçəkqapanını "Təhlükəli" (Critically Endangered) statusuna uyğun edir.

İstinadlar

https://ebird.org/species/iqugna1

https://en.wikipedia.org/wiki/Iquitos_gnatcatcher

https://www.peruaves.org/polioptilidae/iquitos-gnatcatcher-polioptila-clementsi/

https://avibase.bsc-eoc.org/species.jsp?avibaseid=C12E5EDD4BD289DA

https://www.inaturalist.org/taxa/73265-Polioptila-clementsi

https://birdsoftheworld.org/bow/species/iqugna1/cur/introduction

https://animalia.bio/iquitos-gnatcatcher#google_vignette

https://xeno-canto.org/species/Polioptila-clementsi

Tarix : 3 mart 2025

Əksi qeyd olunmayıbsa, bu məzmun CC BY-SA 4.0 çərçivəsində yayımlanır.