Holmestrandⓘ — Norveçin Vestfold dairəsində yerləşən şəhərdir. Şəhər Holmestrand bələdiyyəsinin inzibati mərkəzidir. Ytre Oslofyord sahilində yerləşən şəhər Horten şəhərindən təxminən 13 km şimal-qərbdə, Sande kəndindən isə təxminən 12 km cənubda yerləşir. Böyük Drammen şəhəri təxminən 30 km şimalda yerləşir. 4,52 km² əraziyə malik şəhərin 2024-cü ildə əhalisi 8 258 nəfər, əhalinin sıxlığı isə 1 km²-ə 1826 nəfər təşkil edir. Tarixi 1903-cü ildə şəhərin xəritəsi Oslofyord ətrafında yerləşən Holmestrand təxminən 1550-ci ildən etibarən taxta-şalban limanı kimi inkişaf etməyə başlamışdır. Həmin dövrdə hollandlar buraya taxta almaq üçün gəlirdilər. 1663-cü ildə yaşayış məntəqəsi yaxınlıqdakı Tönsberq şəhərinin tabeliyində gömrük məntəqəsinə çevrildi. 1716-cı ildə böyük yanğın nəticəsində Holmestrandın şimal hissəsi tamamilə yandı. 1744-cü ildə Kral VI Kristian buraya ladested statusu verdi. 1752-ci ildə yeni Kral V Frederik ona şəhər statusu verdi. Yelkənli gəmilər dövründə şəhər inkişaf mərhələsi yaşasa da, buxar gəmilərinə keçid zamanı gəmiçilik şəhəri kimi əvvəlki əhəmiyyətini itirdi. XIX əsrdə şəhər müalicəvi spaları ilə tanınırdı. 1838-ci ildə qəbul edilən yeni formannskapsdistrikt qanunu kiçik şəhərə özünüidarə edən bələdiyyə statusu verdi. 1881-ci ildə istifadəyə verilən Vestfoldbanen dəmir yolu şəhərdə yeni biznes fəaliyyətlərinin inkişafına səbəb oldu. 1884-cü ildə baş verən başqa bir yanğın şəhərin bütün cənub hissəsini məhv etdi. 1902-ci ildə Holmestrand–Vittingfoss dəmir yolunun açılmasından sonra, Holmestrand indiki Kongsberq bələdiyyəsi ərazisində yerləşən Hvittingfossdan gətirilən ağac sellülozunun daşındığı limana çevrildi. Dəmir yolu 1938-ci ildə bağlandı. 1917-ci ildə şəhərin cənubunda alüminium emalı zavodu tikildi. 1967-ci ildə şirkət sonradan 1986-cı ildə Norsk Hydro tərəfindən satın alınan Ardal og Sunndal Verk (ASV) şirkətinin tərkibinə daxil oldu. Zavod Höyangerdən gətirilən alüminiumdan istifadə etməklə, məşhur Höyang markası da daxil olmaqla, alüminium məhsulları istehsal edirdi. Hazırda şəhərdə yerləşən Holmestrand Alüminium Muzeyi Holmestranddakı bu sənayenin tarixini yaşadır. Adı Bələdiyyənin (əvvəlcə şəhərin) adı Holmestranddır. Adın ilk hissəsi "qayalı kiçik ada" mənasını verən "holmi" sözünün yiyəlik halından yaranmışdır. Son hissə isə "sahil" və ya "çimərlik" mənasını verən "strand"sözüdür. Ehtimal olunur ki, bu ad şəhərin hazırda yerləşdiyi ərazinin sahilindən bir qədər aralıda yerləşən üç kiçik adaya işarə edir. Torpağın doldurulması işləri nəticəsində həmin adalar artıq görünmür. Nəqliyyat Avropa E18 marşrutu Vestfold dairəsi boyunca əsas şimal–cənub avtomobil yoludur. Yol Holmestrand şəhərinin bir qədər qərbindən keçir və ikinci dərəcəli yollar şəhər mərkəzini bu magistralla birləşdirir. Vestfoldbanen dəmir yolu xətti Holmestrandın mərkəzindən keçir və şəhərə Holmestrand stansiyası xidmət göstərir. Həmçinin bax Oslo Tromsö Förde Qrimstad Yövik Harstad İstinadlar

İstinadlar

https://az.wikipedia.org/wiki/Holmestrand

https://geohack.toolforge.org/geohack.php?language=az&pagename=Holmestrand&params=59_29_15.0_N_10_19_3.0_E_scale:100000_type:city

https://maps.google.com/maps?ll=59.487500,10.317500&q=59.487500,10.317500&spn=0.1,0.1&t=h&hl=az

https://yandex.ru/maps/?ll=10.317500,59.487500&pt=10.317500,59.487500&spn=0.1,0.1&l=sat,skl

https://www.openstreetmap.org/?mlat=59.487500&mlon=10.317500&zoom=12

https://snl.no/Holmestrand_-_tettsted

https://www.ssb.no/en/befolkning/statistikker/beftett/aar

Tarix : 29 sentyabr 2026