Kurən kəklik (Dendragapus fuliginosus) - Şimali Amerikanın Sakit okean sahil silsilələrində yaşayan meşə kəkliyi növüdür. Bu növ, “tünd kəklik” (Dendragapus obscurus) ilə yaxından əlaqəlidir və əvvəllər bu iki növ “mavi kəklik” adı altında tək bir növ kimi qəbul edilirdi. Təsvir Yetkin fərdlərin uzun və kvadrat formalı quyruğu var, quyruğun ucu açıq boz rəngdədir. Yetkin erkəklər əsasən tünd rəngli olur, sarı boğaz hava kisəsi və ağ zolaqla əhatələnir, həmçinin nümayiş zamanı göz üstündə sarı lələk dəsti olur. Yetkin dişilər isə qəhvəyi rəngli və alaca-bulacadır, alt hissələrində tünd qəhvəyi və ağ ləkələr var. Dişilərin boyunları erkəklərə nisbətən daha uzun və incədir. Erkəklərin bədəni isə dişilərdən daha qalın və möhkəmdir. Yayılması və yaşayış yeri Onların çoxalma yerləri Şimali Amerikanın qərb dağlıq ərazilərində, cənub-şərqi Alyaskadan Yukona qədər və cənuba doğru Kaliforniyaya qədər olan iynəyarpaqlı və qarışıq meşələrin kənarlarıdır. Onların yayılma sahəsi müxtəlif iynəyarpaqlı ağac növləri ilə sıx bağlıdır. Köhnə meşələrdə daha yaxşı inkişaf edirlər, çünki onlar müxtəlif bitki və ağaclara ehtiyac duyurlar. Həmçinin, yenidən bərpa olunmuş kəsilmiş və ya yanmış ərazilər də kurən kəklikləri cəlb edir, xüsusilə kollar və kolluqlar çox olduqda. Yuva, yer səthində, kolu və ya kütüyün altında gizlədilmiş sadə bir çökəklikdən ibarətdir. Miqrasiya Bu quşlar daimi sakinlərdir, lakin qışda daha sıx meşə ərazilərinə qısa məsafələr qədər piyada və ya qısa uçuşlarla hərəkət edirlər. Maraqlı bir vəziyyət odur ki, qışda daha yüksək hündürlüklərə doğru hərəkət edirlər. Payızda nisbətən açıq çoxalma ərazilərindən qışda dərin iynəyarpaqlı meşələrə keçirlər. Qidalanma Bu quşlar qidalanma üçün əsasən yer səthində və ya qışda ağaclarda olurlar. Qışda əsasən küknar və duglas-küknar iynələrini yeyirlər, bəzən həmçinin şümşad və şam iynələrini də yeyirlər. Yayda isə digər yaşıl bitkilər (Pteridium, Salix), giləmeyvələr (Gaultheria, Mahonia, Rubus, Vaccinium) və həşəratlar (xüsusilə qarışqalar, böcəklər, çəyirtkələr) daha vacibdir. Qışda yalnız küknar iynələri ilə yaşamaq qabiliyyətinə malikdirlər. Yazda isə qidalanma daha çox giləmeyvə, yarpaq və çiçəklərdən ibarət olur. Cücələr ilk on gün ərzində demək olar ki, tamamilə həşəratlarla qidalanır. Digər bir çox quş kimi, kurən kəkliklər də qum və kiçik daş parçaları yeyirlər. Bu, onlara qidanın mədəcikdə əzilməsinə kömək edir. Çoxalma Erkəklər öz ərazilərində dərin “hu” səsləri çıxarır və dişiləri cəlb etmək üçün qısa qanad çırpma uçuşları edirlər. Bu səs sanki kimsə dərin, lakin sakit bir baraban vururmuş kimi səslənir. Erkəklər adətən bu çağırışları ağacların yüksək yerlərindən edirlər. Dişilər cütləşdikdən sonra erkəyin ərazisini tərk edir. Dişi yuvasını yer səthində, kolu və ya kütüyün altında qorunan dayaz bir çökəklikdə qurur. Təxminən 5-10 yumurta qoyur. Bu yumurtalar krem rəngli əsas fon üzərində xallı qəhvəyi ləkələrə görə yaxşı kamuflyaj olunur. Qorunma Kurən kəkliklərin populyasiyası cənub Kaliforniyada yaşayış yerlərinin itirilməsi səbəbindən bir qədər azalma yaşayır. Hazırda kurən kəkliyin statusu “risk altında” kimi təsnif edilir. Hal-hazırda növ aşağı qorunma prioriteti daşıyır, lakin köhnə meşələrin azalması davam etdikdə, növün təhlükə altına düşmə riski artacaq.
https://www.allaboutbirds.org/guide/Sooty_Grouse/overview
https://www.allaboutbirds.org/guide/Sooty_Grouse/id
https://birdweb.org/birdweb/bird/sooty_grouse
https://www.audubon.org/field-guide/bird/sooty-grouse
https://www.birdatlas.bc.ca/accounts/speciesaccount.jsp?lang=en&sp=SOGR
https://www.adfg.alaska.gov/index.cfm?adfg=sootygrouse.main
https://en.wikipedia.org/wiki/Sooty_grouse
Tarix : 24 fevral 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
