Barak tazısı- (Bosniya, Serb-Xorvat: Bosanski oštrodlaki gonič / Босански оштродлаки гонич) - Bosniyada inkişaf etdirilən ov iti növü. Bu irq qoxu itidir və əvvəlcə böyük ov heyvanlarını ovlamaq üçün istifadə edilirdi. Tarix Bugünkü irq, yerli it növlərindən törəmişdir və 1890-cı illərdə İtaliya ov itləri ilə çarpazlaşdırılmışdır. Yerli ovçular, effektiv bir qoxu iti yetişdirmək istəyərək, bu irqi 19-cu əsrdə mövcud it növlərindən istifadə edərək inkişaf etdirdilər. Bugünkü kiçik İstriya qısa tüklü tazısının erkən növü də Barak tazısının inkişafına töhfə vermiş ola bilər. Barak tazısı ilk dəfə 1965-ci ildə "Fédération Cynologique Internationale" (FCI) tərəfindən "İlliriyalı Tazı" adı ilə tanındı. Sonradan ad dəyişdirilərək Bosniya mənşəli olduğunu daha dəqiq əks etdirmək məqsədi ilə "Bosniya Kələ-kötür Tüklü Tazısı" adlandırıldı. İrq, FCI tərəfindən 6-cı Qrup (Qoxu İtləri), 1.1 Bölmə (Böyük Ölçülü Tazılar) altında və 155 nömrə ilə təsnif edilir. "Birləşmiş Kennel Klubu" (ABŞ) tərəfindən də "Barak" adı ilə "Qoxu İtləri Qrupu"nda tanınır. Bu irq, digər böyük kennel klubları tərəfindən tanınmasa da, bir çox kiçik kennel klubları, internet it qeydiyyatı şirkətləri və nadir irq qeydiyyatları tərəfindən unikal ev heyvanı kimi təqdim edilir və qeydiyyata alınır. Genetik təhlillər göstərir ki, müasir Barak tazısı yüksək genetik müxtəlifliyə malikdir və ən çox "Tornjak" ilə yaxından əlaqəlidir. Görünüş Ən diqqətçəkən xüsusiyyəti onun qaba, sərt və tüklü xəzidir. Xəz rəngi sarımtıl (buğda rəngi və ya qırmızı) və ya boz rəngdə ola bilər, tez-tez başında ağ bir ləkə və digər ağ işarələr müşahidə edilir. Standartlara görə, bədən uzunluğu hündürlükdən 10% çox olmalıdır. Bu nisbət, Barak Tazısını bölgədəki digər tazılardan fərqləndirmək üçün verilir. Hündürlüyü 43–55 sm, çəkisi isə 16–27 kq arasındadır. İt adətən quyruğunu yuxarıya doğru əyri şəkildə daşıyır. Üzündə saqqal var. Temperament Barak tazısı sahiblərinə qarşı güclü sadiqliyi ilə tanınır və əla gözətçi iti hesab olunur. Bu cins inadkar və cəsur xarakterə malikdir. Ailəsi ilə dost münasibət qurur, oyun oynamaqdan və gəzintilərdən zövq alır. İşləmək arzusu yüksək olduğundan bir tapşırıqla məşğul olması onun davranışını yaxşılaşdırır, çünki özünü faydalı hiss etməyi sevir. Əgər darıxarsa və ya uzun müddət tək buraxılarsa, evdə dağıntılara səbəb ola bilər. Bundan əlavə, dovşan qoxusu hiss etdiyi halda, etdiyi işi yarımçıq qoyub onu təqib etmək üçün inadkarlıq göstərə bilər. Həyətdə qoxuları izləyərkən sahiblərinin çağırışlarını tez-tez görməzlikdən gələ bilər, lakin uşaqlara və digər ev heyvanlarına qarşı heç vaxt aqressiv davranmayan səbirli bir itdir. Barak tazısının yetişdirilməsi zamanı zəkası əsas xüsusiyyətlərdən biri kimi seçilmişdir. Bu səbəbdən Barak ağıllı və asan öyrədilə bilən bir cinsdir. Əksər sahiblər, bu cinsin çoxsaylı fəndləri yerinə yetirdiyini və mürəkkəb tapşırıqları uğurla tamamladığını bildirirlər. Qidalanma Barak üçün yüksək keyfiyyətli və bol proteinli quru it yemi seçmək vacibdir. Bu, itin enerjisini təmin edəcək və əzələlərin sağlam inkişafına kömək edəcək. Qeyri-müəyyən mənbəli proteinlərdən, xüsusilə də bir neçə illik ola bilən, qurudulmuş və üyüdülmüş "ət yan məhsulları"ndan uzaq durmaq məsləhətdir. Bundan əlavə, süni rəngləndiricilər və kimyəvi qoruyucular olan yemlərdən çəkinmək lazımdır. Omega-3 və probiyotiklərlə zənginləşdirilmiş yem markaları əla seçimdir, çünki bunlar itin ümumi sağlamlığı üçün faydalıdır. Həddindən artıq yeməyin qarşısını almaq üçün yem paketinin üzərindəki təlimatları diqqətlə oxunmalıdır.
https://en.wikipedia.org/wiki/Barak_hound
https://wagwalking.com/breed/barak-bosnian-hound
https://www.ukcdogs.com/barak
https://zoobonus.ua/en/breed/bosnian-broken-haired-hound-called-barak?srsltid=AfmBOorKW6aIfpRfLfToQ5nQgtu5J1aST4MRq7puy0SJgLKQMQuvzlwq
https://worlddogfinder.com/breeds/bosnian-coarse-haired-hound
https://www.royalcanin.com/us/es-us/dogs/breeds/bosnian-broken-haired-hound-barak
https://wamiz.co.uk/dog/breeds/271/bosnian-broken-haired-hound-called-barak
https://www.roysfarm.com/barak-hound-dog/
http://www.bhtornjak.com/barak/en/
https://brit-petfood.com/en/breed-catalog/scenthounds-and-related-breeds/bosnian-broken-haired-hound-called-barak
Tarix : 13 yanvar 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
