Lithobates pipiens, adətən şimal leopard qurbağası - Həqiqi qurbağalar fəsiləsinə aid olan və Kanadanın və ABŞ-nin bəzi hissələrinə məxsus bir növü. Bu növ Minnesota və Vermont ştatlarının rəsmi suda-quruda yaşayan canlısıdır. Təsvir Şimal leopard qurbağası kifayət qədər iri bir qurbağa növüdür, uzunluğu təxminən 11 sm çatır. Bel tərəfdən yaşıl və ya qəhvəyi rəngdə ola bilər, belində, yanlarında və ayaqlarında iri, tünd, dairəvi ləkələr var. Hər bir ləkə adətən daha açıq rəngli bir halqayla əhatə olunub. Gözün arxasından başlayan bir cüt dorsolateral qat bir-birinə paralel şəkildə arxaya doğru uzanır. Bu dorsolateral qatlar tez-tez daha açıq və ya bəzən çəhrayı rəngdə olur. Bundan əlavə, burun dəliyindən başlayan açıq bir zolaq gözün altından və timpanonun altından keçərək çiynə qədər uzanır. Qarın tərəfi ağ və ya açıq yaşıl rəngdədir. Gözün iris qatı qızılı rəngdədir və ayaq barmaqları pərdəlidir. Çömçəquyruqlar tünd qəhvəyi və ya boz rəngdədir, alt tərəfində açıq ləkələr var. Quyruğu açıq bej rəngdədir. Rəng növləri Şimal leopard qurbağasının bir neçə fərqli rəng növü var. Ən çox yayılmış iki növ yaşıl və qəhvəyi rəngli morflardır. Bundan əlavə, burnsi morfu adlanan bir növ də var. Burnsi morfunu olan fərdlərin belində ləkələr olmur, lakin ayaqlarında ləkələr ola bilər və ya olmaya bilər. Onlar parlaq yaşıl və ya qəhvəyi rəngdə ola bilər və sarı dorsolateral qatlara malikdirlər. Bu növdə albinizm də müşahidə edilir, lakin bu çox nadirdir. Həmçinin, mavi rəngli fərdlər də var ki, bu da olduqca nadirdir. Ekologiya və davranış Şimal leopard qurbağaları geniş yaşayış sahələrinə malikdirlər. Onlar meşə, açıq və şəhər ərazilərində daimi göllərdə, bataqlıqlarda, şoranlıqlarda və yavaş axan çaylarda tapılır. Onlar adətən su bitkiləri ilə zəngin olan su hövzələrində yaşayırlar. Yay aylarında tez-tez gölləri tərk edərək otlu ərazilərə və çəmənliklərə köçürlər. Onlar soyuğa yaxşı uyğunlaşıblar və dəniz səviyyəsindən 3,000 m yüksəklikdə tapıla bilərlər. Erkəklər yaz və yay aylarında sudan qısa, xırıltılı səs çıxarır. Şimal leopard qurbağası yazda çoxalır. Suya 6500-ə qədər yumurta qoyulur və çömçəquyruqlar çoxalma gölündə inkişafını başa çatdırır. Çömçəquyruqlar açıq qəhvəyi rəngdədir və qara ləkələrə malikdir. İnkişaf şəraitdən asılı olaraq 70–110 gün çəkir. Metamorfoza uğramış qurbağalar 2–3 sm uzunluğunda olur və yetkin fərdlərə bənzəyir. Bu növ bir zamanlar Qərbi Kanada və ABŞ-nin bəzi hissələrində olduqca geniş yayılmışdı, lakin 1970-ci illərdən etibarən sayında azalma başladı. Bu azalmanın dəqiq səbəbi məlum olmasa da, yaşayış mühitinin itirilməsi və parçalanması, ətraf mühit çirklənməsi, introduksiya edilmiş balıqlar, quraqlıq və xəstəliklər azalmanın səbəbləri kimi göstərilir və çox yerlərdə növün bərpasına mane olur. Şimal leopard qurbağalarının bir çox populyasiyası hələ də bu azalmalardan sonra bərpa olunmayıb.
https://www.nps.gov/articles/northern-leopard-frog.htm
https://ontarionature.org/programs/community-science/reptile-amphibian-atlas/northern-leopard-frog/
https://www.nationalgeographic.com/animals/amphibians/facts/northern-leopard-frog
https://wdfw.wa.gov/species-habitats/species/lithobates-rana-pipiens
https://mdc.mo.gov/discover-nature/field-guide/northern-leopard-frog
https://www.env.gov.bc.ca/wld/documents/northernleopard.pdf
https://www.mass.gov/doc/northern-leopard-frog/download
Tarix : 24 fevral 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
