Madaqaskar sarı (elmi adı: "Buteo brachypterus") - Madaqaskara endemik olan yırtıcı bir quş növü. Təsvir Madaqaskar sarı tipik bir "Köhnə Dünya" sarısıdır və lələk rənglərinə görə olduqca dəyişkəndir. Afrika meşə sarı və Palearktik adi sar ilə oxşarlıq göstərir. Tünd boz başı, sinəsində ağ ləkə, qəhvəyi-ağ rəngli qarın və budları qəhvəyi ləkələrlə örtülüdür. Quyruğunda enli qəhvəyi-qara zolaqlar var. Dimdiyi qara, ağız hissəsi boz-mavi, gözləri sarı, ayaqları və pəncələri isə açıq sarı rəngdədir. Yayılması və yaşayış mühiti Madaqaskar sarı Madaqaskar adasına endemikdir və adanın əsas hissəsində yayılmışdır, lakin meşələri qırılmış mərkəzi yaylada daha az rast gəlinir. Bəzi məlumatlara görə, meşələrin parçalanması ilə onun populyasiyasının artdığı güman edilir. Bu növ yaşayış mühitinə uyğunlaşma qabiliyyətinə malikdir və meşə, açıq meşəlik, bərpa olunan və ikinci dərəcəli meşələr də daxil olmaqla müxtəlif yaşayış mühitlərində tapılır. Həmçinin dəniz səviyyəsindən 2300 metr yüksəklikdə olan qayalıq yamaclarında da rast gəlmək olar. Buna baxmayaraq, meşələri qırılmış mərkəzi yaylada hələ də daha az yayılmışdır. Davranış Madaqaskar sarının çoxalma mövsümü iyuldan noyabra qədər davam edir. Yuvalarını ağac çəngəllərində, palma ağaclarında və ya qayalıq çıxıntılarında qurur. Yuva budaqlardan hazırlanır və təzə yarpaqlarla döşənir. Balalıqda adətən 1-2 yumurta olur. Dişi yumurtaları aralıqla qoyur, lakin birinci yumurta qoyulduqdan dərhal sonra basdırmağa başlayır. Yumurtalar çatlandıqdan sonra böyük bala adətən kiçik balanı öldürür və çox nadir hallarda iki bala böyüdülür. Basdırma müddəti 4–5 həftə, balaların uçma müddəti isə 6–7 həftədir. Bu növ opportunist bir ovçudur və kiçik məməlilər, quşlar, kərtənkələlər, ilanlar, qurbağalar, quru xərçəngləri və digər böyük buğumayaqlılar daxil olmaqla müxtəlif ovlarla qidalanır. Bundan əlavə, alimlər lemurların (xüsusilə yaxalı lemur və Verro sifakası) davranışını müşahidə edərkən, onların Madaqaskar sarını görəndə həyəcan siqnalı verdiyini qeyd etmişlər. Bu, gənc lemurların bəzən ov oluna biləcəyini göstərir.
https://en.wikipedia.org/wiki/Madagascar_buzzard
https://avibase.bsc-eoc.org/species.jsp?avibaseid=5CA7B50AC5AE79E6
https://peregrinefund.org/explore-raptors-species/hawks/madagascar-buzzard
https://ebird.org/species/madbuz1
https://www.inaturalist.org/taxa/5222-Buteo-brachypterus
https://ebird.org/species/madbuz1/L4462861
https://datazone.birdlife.org/species/factsheet/madagascar-buzzard-buteo-brachypterus
Tarix : 6 mart 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
