Madaqaskar şanapipiyi (elmi adı: "Upupa marginata") - "Upupidae" fəsiləsinə aid olan bir şanapipiyi növü. Əvvəllər adi şanapipiyinin ("Upupa epops marginata") yarımnövü hesab edilsə də, səslənməsi və lələklərindəki kiçik fərqlərə görə ayrı bir növ kimi təsnif edilmişdir. Bəzi taksonomistlər hələ də hər üç növü eyni növ kimi qəbul edir. Bəzi mütəxəssislər Afrika və Avrasiya şanapipiyilərini birlikdə saxlayır, lakin Madaqaskar şanapipiyisini ayrı bir növ kimi qəbul edir. Bu növ Madaqaskara endemikdir və təbii yaşayış mühiti subtropik və ya tropik quru meşələrdir. Ümumiyyətlə geniş yayılmış bir quşdur və "Beynəlxalq Təbiəti Qoruma İttifaqı" (IUCN) onun qorunma statusunu "ən az narahatlıq doğuran" kimi qiymətləndirir. Təsvir Yetkin Madaqaskar şanapipiyi təxminən 32 sm (12,6 düym) uzunluğunda və 57-91 qram (2,0-3,2 uns) çəkisindədir. Uzun, əyri bir dimdiyi və darçını rəngli lələkləri var, qanadları qalın qara və ağ zolaqlarla örtülüdür. Quyruğu qara rəngdədir və quş həyəcanlandıqda qaldırıla bilən uzun, darçını rəngli kəkili və qara uclu lələklərə malikdir. Qanadları enli və yumru formadadır; xarakterik uçuşu bir neçə qanad vurmasından sonra qanadların qısa müddətə bükülməsi və quşun süzülməsi ilə müşahidə edilir. Dişilər erkəklərdən bir qədər solğun rəngdədir və qanadlarında daha az ağ rəng var. Afrika şanapipiyi ilə müqayisədə daha böyük, daha uzun quyruğu və daha çəhrayı boğazı var. Səsi Afrika şanapipiyinin "hoop-hoop-hoop" səsindən fərqlənir və "aşağı tonlu, coşğun bir trill rrrrrrooow, bir qədər enən, 1,5-2,5 saniyə davam edən və hər 3-10 saniyədən bir təkrarlanan" kimi təsvir edilir. Yayılması və yaşayış mühiti Madaqaskar şanapipiyi Madaqaskara endemikdir və ölkənin şimal, qərb, mərkəz və cənub hissələrində yayılmışdır, şərq hissəsində isə əsasən yoxdur. Meşə kənarlarında, açıq sahələrdə, çəmənliklərdə, savannalarda, otlaqlarda və kolluqlarda yaşayır. Ekologiya Madaqaskar şanapipiyi adətən tək və ya cütlük halında olur, yer üzündə qidalanır, bir neçə addım yeriyir və sonra ətrafa baxır, başını yelləyir, torpağı və yarpaq töküntülərini dimdiyi ilə yoxlayır, yer üzündəki şeyləri götürür, peyinləri yoxlayır və yarıqları araşdırır. Əsasən böcəklər, milçəklər və onların sürfələri, çəyirtkələr və tırtıllar kimi həşəratlarla qidalanır. Narahat olduqda üfüqi bir budağa uçaraq orada qonur, qanadlarını çırpır və kəkilini qaldırıb endirir. Bu növ monoqamdır və əraziyə sahib çıxır. Çütləşmə avqustdan dekabra qədər, əsasən oktyabr və noyabr aylarında baş verir. Yuva ağacda dərin bir boşluqda, adətən yer səviyyəsindən 3 m (10 fut) yüksəklikdə yerləşir. Yuva materialı az istifadə edilir və balalar uçana qədər yuva dağınıq və iyli olur. Bir yuvada altı mavi-boz rəngli yumurta olur. Yumurtaları yalnız dişi basdıra bilər və cütlükdən olan fərdin inkubasiya edən quşa qida verdiyi müşahidə edilmişdir. Digər şanapipiyi növlərində inkubasiya müddəti 15-16 gün, balaların uçma müddəti isə 26-32 gündür. Hər iki valideyn balaların qidalanmasında iştirak edir.
https://en.wikipedia.org/wiki/Madagascar_hoopoe
https://www.oiseaux-birds.com/card-madagascan-hoopoe.html
https://datazone.birdlife.org/species/factsheet/madagascar-hoopoe-upupa-marginata
https://ebird.org/species/madhoo1
https://birdsoftheworld.org/bow/species/madhoo1/cur/introduction
https://dibird.com/species/madagascar-hoopoe/
https://www.oiseaux.net/birds/madagascar.hoopoe.html
https://observation.org/species/156960/
Tarix : 6 mart 2025
Əksi qeyd olunmayıbsa, bu məzmun CC BY-SA 4.0 çərçivəsində yayımlanır.
