Barnevelder - Hollandiya mənşəli toyuq cinsi. Bu cins, 19-cu əsrin sonlarında Asiyadan Avropaya gətirilən "Şanxay" toyuqları ilə yerli Hollandiya toyuqlarının çarpazlaşdırılması nəticəsində yaranmışdır. Bu toyuqlar "Brahma", "Koçin" və "Croad Langshan" cinslərinə bənzəyirdi. Cins adını Hollandiyanın mərkəzindəki "Gelderland" vilayətindəki "Barneveld" bələdiyyəsindən alır. Dişi toyuqlar böyük qəhvəyi yumurtalar verir. Bəzi cinslərdən fərqli olaraq, qışda da yaxşı yumurtlayırlar. Tarixi 1850-ci illərin əvvəllərində Asiya toyuqları Avropaya gətirilməyə başlanmışdı. İlk gəldiyi vaxtlar bütün fərdlər "Şanxay" toyuqları olaraq tanınırdı. Bu toyuqlar əvvəlcə öz aralarında çarpazlaşdırıldı və zaman keçdikcə "Brahma", "Koçin" və "Croad Langshan" kimi cinslərə çevrildi. 1865-ci ildən etibarən "Şanxay toyuqları"ndan bəziləri Barneveld bölgəsindəki yerli kənd toyuqları ilə çarpazlaşdırıldı. Təxminən 1906-cı ildə "Britaniya Buff Orpington" cinsi ilə bəzi çarpazlaşdırmalar olmuşdur. Hans Skippersə görə, Barnevelder cinsinə ən böyük təsir "Langshan" toyuğundan gəlmişdir ki, bu da dözümlülük, qəhvəyi yumurtalar və qışda yaxşı yumurta vermə ilə xarakterizə olunur. Barnevelder adı ilk dəfə 1911-ci ildə Haqada keçirilən "Landbouwtentoonstelling" kənd təsərrüfatı sərgisində nümayiş etdirilən toyuqlara verilmişdir. Bu dövrdən etibarən cinsin növünü və rəngini sabitləşdirmək məqsədilə çoxlu cəhdlər edilmişdir. Lakin, 1919-cu ildə "Hollandiya Toyuq Klubu" Barnevelder cinsinin yeni cins kimi qəbul edilməsi məsələsini müzakirə edərkən, cinsin çox dəyişkən olduğu bildirilmişdir. 1921-ci ildə "Yetişdiricilər assosiasiyası" yaradıldı və ilk standartlar tərtib edildi. Bununla da, cins 1923-cü ildə rəsmi olaraq tanındı. 1921-ci ildən etibarən Barnevelder cinsi Böyük Britaniyaya ixrac edilməyə başlandı. Çünki burada qəhvəyi yumurtalar çox tələb olunurdu. İlk dövrlərdə Barnevelder toyuqları çox dəyişkən idi. Onların tək zolaqlı, ikiqat zolaqlı və lələklərə sahib tükləri var idi. Xüsusiyyətlər Hal hazırda Niderlanddakı "Barnevelder klubu" tərəfindən dörd rəng növü tanınır: ikiqat zolaqlı, ikiqat mavi zolaqlı, qara və ağ, ikiqat gümüşü zolaqlı. Birləşmiş Krallıqda tanınan dörd rəng növü isə bunlardır: ikiqat mavi zolaqlı, ikiqat qəhvəyi zolaqlı, ikiqat gümüşü zolaqlı və ikiqat qara zolaqlı.

İstinadlar

https://en.wikipedia.org/wiki/Barnevelder

https://a-z-animals.com/animals/barnevelder/

https://barnevelder.net/

https://breeds.okstate.edu/poultry/chickens/barnevelders-chickens.html

https://www.poultryaustralia.com.au/barnevelder-cdgo?srsltid=AfmBOoovo3QnEAyPJmwDCRKnYlib_VKeDcW7Sp_zBrn7wVTQHQf5gBmJ

https://www.chickencoopcompany.com/products/barnevelder?srsltid=AfmBOoq8aqh4Sc50L7x8OCH7eTDCSA35TIQPo3b91RT7d13vSXFLgDdR

https://www.getstronganimals.com/post/all-about-the-barnevelder-breed?srsltid=AfmBOooQfk6NnLJv-He3Ga9N3oIgiWQh47n72-43Qqf5Oa58HnVwLWJL

https://www.childschicks.com.au/products/silver-double-laced-barnevelder-chicks-and-eggs

Tarix : 21 dekabr 2024

Əksi qeyd olunmayıbsa, bu məzmun CC BY-SA 4.0 çərçivəsində yayımlanır.